შინაგან საქმეთა მინისტრის მოადგილის კახაბერ საბანაძის განცხადებით, პოლიციას ცენტრალურ საარჩევნო კომისიასთან შეკრებილი მოქალაქეების წინააღმდეგ ცრემლსადენი გაზი არ გამოუეყენებია.

ამის შესახებ მინისტრის მოადგილემ შინაგან საქმეთა სამინისტროში გამართულ ბრიფინგზე განაცხადა.

"საქართველოს შინაგან საქმეთა სამინისტრო წარმოადგენს საზოგადოების უსაფრთხოებასა და მართლწესრიგის დაცვაზე პასუხისმგებელ უწყებას. სამინისტრო მთელი დღის განმავლობაში აქციაზე უზრუნველყოფდა, როგორც საზოგადოებრივი უსაფრთხოებისა და მართლწესრიგის დაცვას, ასევე, თითოეული ადამიანის გამოხატვის თავისუფლებას, რომელიც არ გასცდა კანონით დასაშვებ ფარგლებს.

დღის ბოლოს, ცენტრალურ საარჩევნო კომისიასთან მიმდინარე აქციის დროს, აქციის მონაწილეები შეეცადნენ შეჭრილიყვნენ ცენტრალური საარჩევნო კომისიის შენობაში, რაც კადრებშიც კარგად ჩანს და რისი საშუალებაც მათ პოლიციამ არ მისცა.

ვინაიდან აქციის მონაწილეები იყენებდნენ ძალადობრივ მეთოდებს და არ ემორჩილებოდნენ პოლიციის მითითებებს, შინაგან საქმეთა სამინისტრომ მისთვის კანონით მინიჭებული უფლებამოსილების ფარგლებში გამოიყენა პროპორციული ძალა.

შინაგან საქმეთა სამინისტრო, როგორც მართლწესრიგის დაცვაზე პასუხისმგებელი უწყება, მოუწოდებს ყველა მოქალაქეს, აქციის ორგანიზატორებსა და მონაწილეებს, დაიცვან მართლწესრიგი და დაემორჩილონ პოლიციის კანონიერ მოთხოვნებს. აქციის მიმდინარეობისას, სამართალდარღვევის ნებისმიერი ფაქტი, პოლიციის მიერ, კანონის ფარგლებში, დაუყოვნებლივ იქნება აღკვეთილი", - განაცხადა საბანაძემ.

შეგახსენებთ, ცენტრალურ საარჩევნო კომისისასთან შეკრებილმა მოქალაქეებმა განაცხადეს, რომ პოლიციამ მათ წინააღმდეგ ცრემლსადენი გაზი გამოიყენა.

მანამდე, პოლიციამ აქციის მონაწილეებისმ მიმართულებით წყლის ჭავლი გაუშვა.