მოწმემ დაადასტურა, რომ  აეროპორტში, ბრალდებულმა თავად ამოიღო ის „დეზოდორი“, რომლის თავსახურშიც საწამლავი ჰქონდა დამალული, - განაცხადა ე.წ ციანიდის საქმის პროკურორმა ჯარჯი წიკლაურმა.

მისივე თქმით, აეროპორტის თანამშრომლებმა დაადასტურეს, რომ დეკანოზ გიორგი მამალაძის ბარგში  მომწამვლელი ნივთიერება - ციანიდი იყო.

„ბრალდებულმა გაიარა რეგისტრაცია, ჩააბარა ბარგი და ამ თანამშრომლების თვალწინ ამოიღეს უმოკლეს დროში ბარგი. ბარგი შემოწმდა, არ ჰქონდა დაზიანება. გახსნილი არ იყო და ამ თანამშრომლების თვალწინ დაილუქა. არავითარი მანიპულაცია ბარგზე არ მომხდარა. მოწმემ დაადასტურა, რომ ბარგში აღმოჩნდა მომწამვლელი ნივთიერება ციანიდი. თავად ბრალდებულმა ამოიღო ის „დეზოდორი“, რომლის თავსახურში მას ჰქონდა დამალული საწამლავი, რადგან აეროპორტის კონტროლის გვერდის ავლით გაეარა ამ ნივთიერებას. საბედნიეროდ, ეს ნივთიერება გადმოვარდა თავსახურიდან და გამომძიებელმა აიღო. დალუქვა მოხდა აეროპორტში. ფიზიკურად შეუძლებელია ლუქის გაჭრის გარეშე რამე მოთავსებულიყო. ამას ადასტურებს ფოტოსურათები. მთელი პროცესია დასურათებული, რა საჭიროება იყო ვიდეომასალის? სურათები გასაჯაროვდება და თქვენი თვალით ნახავთ, რომ დაზიანებული არ იყო. ბრალდებულს სურდა ეს „დეზოდორი“ მალულად გაეპარებინა, მაგრამ შემთხვევით გადმოუვარდა,  ეს ყველამ იხილა", - განაცხადა წიკლაურმა.