„თავისუფლება მამა გიორგის“,-  ამ წარწერითა და დეკანოზის ფოტოთი გაფორმებული მაისურებით თბილისის საქალაქო სასამართლოში დეკანოზ გიორგი მამალაძის მხარდამჭერები მივიდნენ. ისინი მამაოს გათავისუფლებასა და ამასთანავე, სასამართლო პროცესების გახსნას ითხოვენ.

მხარდამჭერებს შორის ერთ-ერთი დეკანოზ მამალაძის ნათლულია.

როგორც სასამართლოში მისულმა მხარდამჭერება აღნისნეს, ისინი აქციების გამართვასაც გეგმავენ.

„ჩვენი აქ მოსვლის მიზანია სოლიდარობა გამოვუცხადოთ მამა გიორგის, აქციის ჩატარებას ვაპირებთ პროკურატურასთან. მთავარი მოთხოვნაა გაიხსნას სასამართლო პროცესი. რაც შეეხება პროტესტს, ლამის უკვე ნახევარი თბილისი აჭრელებულია წარწერებით - „თავისუფლება მამა გიორგის".

დარწმუნებული იყოს პროკურატურა და მისი წარმომადგენელი, ვიდრე პროცესი არ გაიხსნება, არ მოვასვენებთ. სწორედ ამას ითხოვს მამა გიორგიც, რომ პროცესი იყოს ღია, რადგან მას საზოგადოებისთვის დასამალი არაფერი აქვს",-განაცხადა მამა გიორგი მამალაძის მხარდამჭერმა ოთარ მამარდაშვილმა.

ე.წ. ციანიდის საქმეზე ამ წუთებში დახურულ პროცესზე აეროპორტის უსაფრთხოების თანამშრომლები იკითხებიან. 

საქმის პროკურორის, ჯარჯი წიკლაურის განცხადებით, დღეს დაიკითხებიან აეროპორტის უსაფრთხოების ის თანამშრომლები, ვის თვალწინაც და ვისი მონაწილეობითაც, პროკურორის თქმით, საგამოძიებო უწყებამ დეკანოზის ჩანთიდან ციანიდი ამოიღო.