მიმაჩნია, რომ საქართველოს ხელისუფლებას აქვს მიზანი მოკლას მიხეილ სააკაშვილი - ზელენსკი

მიმაჩნია, რომ საქართველოს ხელისუფლებას აქვს მიზანი მოკლას მიხეილ სააკაშვილი, - ამის შესახებ უკრაინის პრეზიდენტმა ვოლოდიმირ ზელენსკიმ კიევში, ავსტრიის პრეზიდენტთან ალექსანდრ ვან დერ ბელენთან ერთობლივ პრესკონფერენციაზე განაცხადა.

ზელენსკის სიტყვებით, პრესკონფერენციის დაწყებამდე მას სააკაშვილის დღევანდელი მდგომარეობის ამსახველი ფოტოები გადასცეს.

„ოდესღაც ის საქართველოს პრეზიდენტი იყო. მიხეილ სააკაშვილი, ის {ფოტოსურათები} დავით არახამიამ გადმომცა. მსურს, რომ ნახოთ, როგორ გამოიყურება ის“, - თქვა ზელენსკიმ

„მიმაჩნია, რომ დღეს, საქართველოს ხელისუფლება მას კლავს. თქვენ იცით, რომ მათ ის მოწამლეს და ახლა ნელ-ნელა კლავენ“, - თქვა ზელენსკიმ.

მისი თქმით, სურს, რომ მედიამ ნახოს, როგორ აწამებენ უკრაინის მოქალაქეს.

„მსურს მედიამ ნახოს, რაც ხდება: საჯაროდ აწამებენ უკრაინის მოქალაქეს. მე არ ვსაუბრობ საკითხზე - რისთვის დააპატიმრეს საქართველოს ყოფილი პრეზიდენტი, რა შედეგები მოჰყვება ამას საქართველოს პოლიტიკისა და დემოკრატიისათვის, ეს მათი შიდა საკითხია. მე ვლაპარაკობ უკრაინის მოქალაქის მიხეილ სააკაშვილის დაპატიმრებაზე, რომელსაც ყოველდღიურად საჯაროდ აწამებენ, მიმაჩნია, რომ {საქართველოს ხელისუფლებას} აქვს მიზანი - ის მოკლას“, - თქვა ზელენსკიმ.