„თავისუფალი დემოკრატების“ მიერ დასახელებულმა მაჟორიტარი დეპუტატობის კანდიდატმა კანდიდატურა მოხსნა. „დიას“ ინფორმაციით, გიორგი ცხადიაშვილი პოლიტიკიდან მიდის და საპარლამენტო არჩევნებზე საკუთარი კანდიდატურა მოხსნა. ცხადიაშვილი „თავისუფალმა დემოკრატებმა“ ხაშურის მაჟორიტარი დეპუტატობის კანდიდატად დაასახელეს. ის არჩევნებში გამარჯვებას აანონსებდა, თუმცა 3 თვით ადრე არჩევნებში მონაწილეობის მიღება გადაიფიქრა. 

გიორგი ცხადიაშვილი პოლიტიკიდან წასვლის და მისი კანდიდატურის მოხსნის შესახებ ინფორმაციას არც უარყოფს და არც ადასტურებს. თუმცა „თავისუფალი დემოკრატების“ მაჟორიტარი დეპუტატობის უკვე ყოფილმა კანდიდატმა ხაშურის მუნიციპალიტეტის საკრებულოს მანდატი უკვე დატოვა.

გიორგი ცხადიაშვილი თავისუფალი დემოკრატების ლიდერმა, ირაკლი ალასანიამ მაჟორიტარ დეპუტატობის კანდიდატად 16 მაიისს გორში გამართულ ყრილობაზე დაასახელა. მის პოლიტიკიდან წასვლას არ ადასტურებს თავისუფალი დემოკრატების შიდა ქართლის ორგანიზაციის თავმჯდომარე, თუმცა თამაზ შიოშვილი იმას არ უარყოფს რომ ცხადიაშვილმა საკრებულო მართლაც დატოვა.

ის, რომ გიორგი ცხადიაშვილმა ხაშურის მაჟორიტარი დეპუტატის მანდატის მოსაპოვებლად ბრძოლა შეწყვიტა უკვე იციან ხაშურში, თუმცა „თავისუფალი დემოკრატების“ ახალი კანდიდატის ვინაობაზე ჯერჯერობით არავინ საუბრობს. „დიას“ წყაროზე დაყრდნობით, გიორგი ცხადიაშვილი მის მიერ მიღებული გადაწყვეტილების მიზეზებზე უახლოეს მომავალში გააკეთებს განცხადებას.