დღეს, ევროპის რეკონსტრუქციისა და განვითარების ბანკის 25-ე წლისთავთან დაკავშირებით, კავკასიაში, მოლდოვასა და ბელორუსში ევროპის რეკონსტრუქციისა და განვითარების ბანკის (EBRD) რეგიონალურმა დირექტორმა, ბრუნო ბალვანერამ და საქართველოს ფინანსთა მინისტრმა, EBRD-ში საქართველოს მხრიდან მმართველმა, ნოდარ ხადურმა ერთობლივი ბრიფინგი გამართეს.

ბანკის რეგიონალურმა დირექტორმა მედიის წარმომადგენლებს წარუდგინა ევროპის რეკონსტრუქციისა და განვითარების ბანკის მიერ საქართველოში განხორციელებული წარმატებული პროექტები და ისაუბრა საქართველოს მთავრობასთან, ფინანსთა სამინისტროსთან არსებულ თანამშრომლობასა და ნაყოფიერ პოლიტიკურ დიალოგზე.

ბრიფინგზე ფინანსთა მინისტრმა, ნოდარ ხადურმა ხაზი გაუსვა იმ მხარდაჭერის მნიშვნელობას, რომელსაც ევროპის რეკონსტრუქციისა და განვითარების ბანკი უწევს საქართველოს როგორც ფინანსური თანამშრომლობის, ისე ევროპასთან ურთიერთობის გაღრმავებისა და ინვესტიციების მოზიდვის მიმართულებით. როგორც მინისტრმა აღნიშნა, მნიშვნელოვანია ბანკის როლი საქართველოში ფინანსური ბაზრების განვითარების კუთხითაც, აღსანიშნავია ბანკის თანამშრომლობა ინვესტორთა საბჭოში. ფინანსთა მინისტრმა კიდევ ერთხელ მადლობა გადაუხადა ბანკს იმ გადაწყვეტილებისთვის, რომლის საფუძველზეც 2015 წლის მაისში ბანკის წლიური შეხვედრის ადგილად შერჩეულ იქნა საქართველო. მინისტრის თქმით, მისასალმებელია ბანკის გადაწყვეტილება, აქტიურად ჩაერთოს საქართველოს მთავრობის ოთხი ძირითადი მიმართულებით დაგეგმილი რეფორმების განხორციელების პროცესში.

„წელს, საქართველო და ევროპის რეკონსტრუქციისა და განვითარების ბანკი საიუბილეო თარიღებს აღნიშნავენ. 25 წელი გავიდა საქართველოს დამოუკიდებლობის აღდგენის დღიდან და 25 წელი შესრულდა ჩვენი ბანკის დაფუძნებიდან. მოხარულები ვართ, რომ საქართველო ჩვენი დიდი ოჯახის წევრია. ამ წლების განმავლობაში ბანკი აქტიურად მონაწილეობდა ყველა იმ პროცესში, რომელიც ქვეყნის ეკონომიკის განვითარებისა და ინვესტიციების მოზიდვის მიზნით განხორციელდა. მიგვაჩნია, რომ საქართველო საუკეთესო ქვეყანაა რეფორმების თვალსაზრისით, მიმზიდველი საინვესტიციო გარემოთი, საერთაშორისო სტანდარტების დანერგვის კუთხით. სწორედ ამიტომ, საქართველოში ბანკის მიერ განხორციელებული ინვესტიციები ერთ-ერთი ყველაზე მაღალია ჩვენს საინვესტიციო პორტფელში. წელს, ევროპის რეკონსტრუქციისა და განვითარების ბანკი რეკორდული, დაახლოებით, 400 მლნ. ევროს ოდენობის ინვესტიციების განხორციელებას გეგმავს ქვეყანაში, მათ შორის, ჰიდროენერგეტიკაში, საბანკო სექტორში, მუნიციპალურ ინფრასტრუქტურასა და კერძო სექტორში. ჩვენ პოზიტიურად ვუყურებთ საქართველოს განვითარების პერსპექტივას და იმედი გვაქვს, ჩვენ შორის წარმატებული თანამშრომლობა მომავალშიც გაგრძელდება“, - განაცხადა კავკასიაში, მოლდოვასა და ბელორუსში ევროპის რეკონსტრუქციისა და განვითარების ბანკის რეგიონალურმა დირექტორმა, ბრუნო ბალვანერამ.

აღსანიშნავია, რომ საქართველოსა და ევროპის რეკონსტრუქციისა და განვითარების ბანკს შორის თანამშრომლობის 24 წლის განმავლობაში, ბანკის ინვესტიციებმა საქართველოს ეკონომიკაში დაახლოებით 2.6 მილიარდი ევრო შეადგინა.