შოკირებული ვიყავი ელჩ ჰარცელის მიმართ კომენტარების მოსმენით, - თქვა აშშ-ის ელჩმა საქართველოში, კელი დეგნანმა, ევროკავშირის ელჩ კარლ ჰარცელის წინააღმდეგ "ქართული ოცნების" წარმომადგენლების მხრიდან გაკეთებულ განცხადებებზე.

"შოკირებული ვიყავი ელჩ ჰარცელის მიმართ კომენტარების მოსმენით. უპატივცემულობაა ასეთი რაღაცების თქმა იმ ადამიანზე, რომელმაც 4 წლის განმავლობაში ძალიან ბევრი იმუშავა საქართველოს ევროპული მომავლისთვის. ძნელია წარმოდგინო ვინმე, ვინც მეტი გააკეთა საქართველოს დასახმარებლად ევროპულ გზაზე თავისი საქართველოში ყოფნის პერიოდში და მე სრულად ვუჭერ მხარს მის თავდაუზოგავ მცდელობას საქართველოს დასახმარებლად. სხვებმა კი პასუხისმგებლობა უნდა აიღონ საკუთარ ქმედებებზე და აღიარონ ელჩი ჰარცელის ძალიან კარგი მუშაობა საქართველოში ყოფნის პერიოდში. მან ძალიან ლამაზი მესიჯი დაუტოვა საქართველოს მოსახლეობას, თუ რამდენად სასიამოვნო იყო მისთვის საქართველოში ყოფნა და ვფიქრობ, ეს არის საუკეთესო მემკვიდრეობა ელჩი ჰარცელისთვის საქართველოში", - განაცხადა დეგნანმა.

"ქართული ოცნების" თავმჯდომარემ, ირაკლი კობახიძემ კარლ ჰარცელთან დაკავშირებით განაცხადა, რომ ელჩი მხოლოდ უარყოფით როლს ასრულებდა ევროკავშირისა და საქართველოს ურთიერთობებში.

"სამწუხაროდ, კარლ ჰარცელი მხოლოდ უარყოფით როლს ასრულებდა ევროკავშირისა და საქართველოს ურთიერთობებში, ჩვენ იმედი გვაქვს, რომ მომავალი ელჩი განსხვავებულად იმოქმედებს."- თქვა კობახიძემ.

ნიკოლოზ სამხარაძემ კი, რთქვა, რომ "ჰარცელს შეეძლო უკეთ ემუშავა, რათა საქართველოს კანდიდატის სტატუსი მიეღო."