მედიის ინფორმაციით, რუსეთის ხელისუფლებამ კატინის მემორიალური კომპლექსიდან პოლონეთის სახელმწიფო დროშა ჩამოხსნა. ინფორმაცია დაადასტურა რუსეთის თანამედროვე ისტორიის მუზეუმის დირექტორმა ირინა ველიკანოვამაც. მისი თქმით, პოლონეთის დროშის ჩამოხსნა მიმდინარე პოლიტიკურმა ვითარებამ გამოიწვია.

„ორი დროშა - რუსეთისა და პოლონეთის - წარმოადგენდა ჩვენი ქვეყნების მეგობრობის სიმბოლოს. იმას, რაც დღეს ხდება, მეგობრობასთან არანაირი კავშირი აქვს. პოლონეთმა რუსეთის ფედერაციის მიმართ ღიად დაიკავა მტრული პოზიცია“, - წერს ველიკანოვა ტელეგრამ-არხზე.

აღნიშნულთან დაკავშირებით კომენტარი გააკეთა სმოლენსკის მერმა ანდრეი ბორისოვმაც. „გამოვხატავ საერთო აზრს. პოლონეთის დროშა  ვერ იქნება რუსეთის მემორიალებზე! პოლონელი პოლიტიკოსების ღია ანტირუსული განცხადებების შემდეგ კი - მით უფრო.

მიმაჩნია, რომ რუსეთის კულტურის სამინისტრომ მიიღო ერთადერთი სწორი გადაწყვეტილება - ჩამოეხსნა პოლონეთს დროშა. კატინი - ეს არის რუსული მემორიალი, ეს რუსეთის ისტორიაა“, - წერს ბორისოვი სოციალურ ქსელში „ვკონტაკტე“.

მეორე მსოფლიო ომის დროს, რუსეთში, სოფელ კატინის ტერიტორიაზე შინაგან საქმეთა სახალხო კომისარიატის (სსრკ-ს ნკვდ-ს) თანამშრომლებმა დახვრიტეს პოლონეთის მოქალაქეები - ძირითადად პოლონური არმიის ოფიცრები.

მასობრივიხოცვა-ჟლეტა მოხდა 1940 წელს. როგორც 1992 წელს გამოქვეყნებული დოკუმენტებით დასტურდება, სიკვდილით დასჯა განახორციელა ნკვდ-ს ტროიკამ სკკპ ცკ-ის პოლიტბიუროს 1940 წლის 5 მარტის გადაწყვეტილების შესაბამისად. გამოქვეყნებული საიდუმლო დოკუმენტების მეშვეობით დადასტურდა, რომ დახვრიტეს 21 857 პოლონელი ტყვე. ცხედრები კატინის ტყეში დამარხეს.