ჩინეთის თავდაცვის მინისტრმა ვეი ფენჰემ სინგაპურში, ამერიკის თავდაცვის მდივან ლოიდ ოსტინთან შეხვედრაზე განაცხადა, რომ ტაივანის მიერ დამოუკიდებლობის გამოცხადების შემთხვევაში მისი ქვეყანა არც კი დაფიქრდება, ისე დაიწყებს საომარ მოქმედებებს. იუწყება CNN.

ოსტინმა კოლეგა დაარწმუნა, რომ აშშ მხარს უჭერს „ერთიანი ჩინეთის“ პოლიტიკას, მაგრამ აღნიშნა, რომ ჩინეთის არმიის მოქმედებები რეგიონში უპასუხისმგებლოა. ამასთან, ფენჰემ აღნიშნა, რომ შეერთებული შტატები ტაივანისთვის შეიარაღების მიწოდებით დესტაბილიზაციის პროვოცირებას ახდენეს.

ასევე, ჩინეთის თავდაცვის სამინისტროს წარმომადგენელმა ვუ ციანმა განაცხადა, რომ ვეი ფენჰემ ოსტინი საომარი მოქმედებების მზადყოფნის შესახებ გააფრთხილა.

„თუ ვინმე ჩინეთისთვის ტაივანის ჩამოშორებას გადაწყვეტს, ჩინეთის არმია ყოყმანის გარეშე ომს დაიწყებს, ყოველგვარი შესაძლო დანაკარგების მიუხედავად“, - განაცხადა ფენჰემ.

ლოიდ ოსტინმა ჩინელ სამხედროებს მოუწოდა არ მოახდინონ დესტაბილიზაციის პროვოცირება რეგიონში და არ შეცვალონ სტატუს-კვო.

ამის გარდა, აშშ-ის თავდაცვის მდივანმა კატეგორიულად განაცხადა, რომ ჩინეთმა არანაირი მატერიალური დახმარება არ უნდა გაუწიოს რუსეთს, უკრაინაში გაჩაღებული, დანაშაულებრივი ომის ფონზე. ვუ ციანმა ოსტინი დაარწმუნა, რომ ჩინეთი მხარს არ უჭერდა და არ დაუჭერს რუსეთს.