ამერიკის ომის შემსწავლელმა ინსტიტუტმა (ISW) უკრაინის ფრონტზე მიმდინარე მოვლენების ყოველდღიური ანგარიში გამოაქვეყნა.

ექსპერტების თანახმად, რუსეთის ჯარებმა, სავარაუდოდ, გარკვეულ პროგრესის მიაღწიეს პოპასნიას ჩრდილოეთით, დასავლეთით და სამხრეთით, რათა გააგძრელონ შეტევა სევეროდონეცკზე სამხრეთიდან. ექსპერტებს მიაჩნიათ, რომ რუსეთი გააგრძელებს სევეროდონეცკისა და ლისიჩანსკის ალყაში მოქცევის მცდელობას.

ამასთან, რუსულმა მხარემ, შესაძლოა, მიზანმიმართულად გაზარდოს უკრაინელი სამხედროების რაოდენობა, რომლებმაც „აზოვსტალი“ დატოვეს. ექსპერტების აზრით, რუსეთმა ეს შესაძლოა შემდეგი მიზეზით გააკეთოს: ან მიაღწიოს გადაცვლის დროს რუსი ტყვეების მაქსიმალური რაოდენობის მოთხოვნას, ან გაექცეს იმის აღიარებას, რომ მხოლოდ ასობით უკრაინელი მებრძოლი დიდი ხნის განმავლობაში ახერხებდა ქარხნის ტერიტორიაზე კონტროლის შენარჩუნებას.

ამასთან, ვრცელდება ინფორმაცია, რომ რუსებმა ხარკოვიდან ჩრდილოეთით დაიბრუნეს რამდენიმე პოზიცია, რომლებიც უკრაინის კონტრშტევის დროს დაკარგეს. მაგრამ ექსპერტები ვარაუდობენ, რომ რუსი სამხედროები ხარკოვიდან უკან დახევას მალე დაასრულებენ.

როგორც ჩანს, რუსეთის ძალები უკრაინელი სამხედროების კონტრშეტევისა და სამხრეთის მიმართულებით გაჭიანურებული კონფლიქტისთვის ემზადებიან.

20 მაისს რუსეთის თავდაცვის სამინისტრომ გაავრცელა ინფორმაცია, რომ  გასული დღის განმავლობაში ქარხანაში მყოფი ბოლო 531-კაციანი ჯგუფი ჩაბარდა. მათივე ცნობით, ბოლო რამდენიმე დღის განმავლობაში სულ 2439 ადამიანი ჩაბარდა და "აზოვსტალის" ქარხნის ტერიტორია მთლიანად რუსეთის ჯარების კონტროლის ქვეშ მოექცა.

ზელენსკიმ განაცხადა, რომ "აზოვსტალიდან" მევრძოლების ევაკუაცია დასავლელი პარტნიორების ჩართულობით ხორციელდება და დეტალების შესახებ ინფორმაცია ჯერ არ ვრცელდება. 

„აზოვსტალიდან“ მარიუპოლის დამცველების ევაკუაციის ოპერაცია 16 მაისს დაიწყო. უკრაინის თავდაცვის სამინისტროს ინფორმაციით, 16 მაისს ევაკუირებულია 264 უკრაინელი სამხედრო. მათგან 53 მძიმედ დაჭრილი მებრძოლი გადაიყვანეს რუსების მიერ კონტროლირებად ქალაქ ნოვოაზოვსკის სამედიცინო დაწესებულებაში, 211 კი, ჰუმანიტარული დერეფნით ჩაიყვანეს ოლენევკაში, საიდანაც უკრაინული მხარის ცნობით, გაცვლის პროცედურა ჩატარდება და მათ უკრაინის ხელისუფლების მიერ კონტროლირებულ ტერიტორიაზე დააბრუნებენ.

18 მაისს გავრცელდა ინფორმაცია, რომ "აზოვსტალიდან“ გაყვანილი 300-ზე მეტი უკრაინელი სამხედრო ოლენევკის საპატიმროში მიიყვანეს. მათ შორის 50 ადამიანი მძიმედ დაჭრილია.