შვედეთის საგარეო საქმეთა მინისტრმა ენ ლინდემ ხელი მოაწერა ჩრდილოატლანტიკურ ალიანსში ქვეყნის გაწევრიანების განაცხადს.

ამ ნაბიჯით, შვედეთმა ოფიციალურად დაასრულა სამხედრო ნეიტრალიტეტი, რომელსაც ათწლეულების განმავლობაში ინარჩუნებდა. სამხედრო ალიანსში გაწევრიანების გაზრახვა რუსეთის უკრაინაში შეჭრამ განაპირობა.

ენ ლინდეს განცხადებით, ნატოში გაწევრიანების განაცხადი მნიშვნელოვანი მომენტია შვედისთვის.

" ჩვენ მივედით დასკვნამდე, რომელიც საუკეთესოა შვედეთისთვის. არ ვიცით, რამდენი ხანი დასჭირდება ამას, თუმცა ჩვენი გათვლით, ამას შესაძლოა, ერთ წლამდე დასჭირდეს", - განაცხადა შვედეთის საგარეო საქმეთა მინისტრმა.

ენ ლინდეს განცხადებით, შვედეთი ბრიუსელში განაცხადს ფინეთთან ერთად წარადგენს.

16 მაისს, შვედეთის პრემიერ-მინისტრმა მაგდალენა ანდერსონმა განაცხადა, რომ ქვეყანა უნდა შეუერთდეს ნატოს მეზობელ ფინეთთან ერთად, რათა "უზრუნველყოს შვედი ხალხის უსაფრთხოება".

რუსეთის პრეზიდენტმა ვლადიმირ პუტინმა განაცხადა, რომ ორი სკანდინავიური ქვეყნის ნატოში შესვლა პირდაპირ საფრთხეს არ შეუქმნის რუსეთს, მაგრამ სამხედრო წარმომადგენლობის გაფართოება ამ ტერიტორიაზე "რა თქმა უნდა გამოიწვევს მოსკოვის პასუხს".

ნატოში გაწევრიანებისთვის მისი ყველა, 30-ვე წევრის თანხმობაა საჭირო. ამ დროისთვის, თურქეთი აცხადებს, რომ მხარს არ დაუჭერს სკანდინავიური ქვეყნების ნატოში გაწევრიანებას.