აზერბაიჯანის მედიის ინფორმაციით, ევროვიზიის მუსიკალურ კონკურსზე, რომელიც უკრაინის გამარჯვებით დასრულდა, აზერბაიჯანის ეროვნულმა ჟიურიმ უმაღლესი 12 ქულა უკრაინას მისცა და არა დიდ ბრიტანეთს, როგორც ეს კონკურსის მიმდინარეობისას, პირდაპირ ეთერში გამოაცხადეს.

ევროვიზიის კონკურსის ფინალში თითოეული ქვეყნის წარმომადგენელი ერთვება პირდაპირ ეთერში და აცხადებს ქულათა რაოდენობას, რომელსაც ეროვნული პროფესიული ჟიური კონკურსანტებზე ანაწილებს.

როდესაც აზერბაიჯანის ეროვნული ჟიურის შედეგების გამოცხადების დრო დადგა, ცნობილი გახდა, რომ ბაქოსთან კავშირის ტექნიკური შეფერხების გამო, შედეგებს გამოაცხადებდა არა ტელეწამყვანი ნარმინ სალმანოვა, არამედ ევროპის მაუწყებელთა კავშირის წარმომადგენელი. მსგავსი შემთხვევა მოხდა რამდენიმე სხვა ქვეყანასთან მიმართებაში, მათ შორის რუმინეთსა და საქართველოში.

პირდაპირ ეთერში გამოცხადდა, რომ აზერბაიჯანის ჟიურისგან 12 ქულა ბრიტანეთმა მიიღო, სხვა ქულები კი ასე განაწილდა - იტალია - 10 ქულა, შვედეთი - 8 ქულა, პორტუგალია - 7 ქულა, უკრაინა - 6 ქულა, ესპანეთი - 5 ქულა, ნიდერლანდები - 4 ქულა, საბერძნეთი - 3 ქულა, პოლონეთი - 2 ქულა და საფრანგეთი - 1 ქულა.

კონკურსის დასრულებისთანავე, აზერბაიჯანის ტელეარხ ITV-ზე განიხილეს შედეგები, სადაც ტელეწამყვანმა ნარმინ სალმანოვამ თქვა, რომ გაკვირვებული იყო აზერბაიჯანის შედეგების ეკრანზე ხილვით, რადგან ის არ შეესაბამებოდა რეალობას.

ტელეწამყვანმა თქვა, რომ აზერბაიჯანმა 12 ქულა მისცა უკრაინას და არა დიდ ბრიტანეთს, და დააკონკრეტა, რომ არხს ტექნიკური პრობლემები არ ჰქონდა ევროპაში მაუწყებლობასთან დაკავშირებით. სალმანოვას თქმით, ამ საკითხზე წარმოება უკვე დაწყებულია.

განცხადება გააკეთა აზერბაიჯანული ტელეარხის წარმომადგენელმა ფარიდა რასულოვამაც:

"აზერბაიჯანმა 12 ქულა მისცა უკრაინას და არა დიდ ბრიტანეთს. ჩვენთან ტექნიკური პრობლემა არ ყოფილა. აღნიშნულ საკითხზე მიმდინარეობს გამოძიება, რომლის შედეგებსაც ფართო საზოგადოებას გააცნობენ".