სუმის ოლქში ქალაქ ტროსტიანეცში გამოძიების სახელმწიფო ბიუროს გამომძიებლებმა აღმოაჩინეს რუსი სამხედროების დოკუმენტები, რომლებიც შეიცავს რუსეთის გეგმას უკრაინის მთელი ტერიტორიის დაპყრობის შესახებ.

უწყების პრეს-სამსახურის ინფორმაციით, დოკუმენტები ცხადყოფს, რომ რუსეთი ემზადებოდა უკრაინის მთელი ტერიტორიის დასაპყრობად. აღნიშნული ინფორმაცია საქმის მასალებს დაერთო.

გამომძიებლებმა დანგრეული ქალაქის 2 ათასზე მეტი ჰექტარის ფართობი შეისწავლეს, დადგენილია საბრძოლო პოზიციები, საიდანაც მიმდინარეობდა ცეცხლის გახსნა.  

ამოღებულია რუსი სამხედროების დოკუმენტები და პირადი ნივთები. ტროსტიანეცში დანგრეულია 322 საცხოვრებელი სახლი და სამოქალაქო ობიექტი.

ასევე დადგენილია ადგილები, სადაც ოკუპანტები აწამებდნენ მშვიდობიან მოსახლეობას. დაფიქსირებულია მოქალაქეების გატაცებისა და წამების 34 ფაქტი. დანაშაულის ადგილებზე აღმოჩენილია ხელკეტები, ბორკილები და ნაწამები ადამიანების სისხლიანი ტანსაცმელი. ამასთან, მოხდა 23 მოკლულის, მათ შორის ორი ბავშვის ცხედრის ექსჰუმაცია.