უკრაინის პრეიდენტმა ვოლოდიმირ ზელენსკიმ განაცხადა, რომ რუსეთი მეორე დღეა სარაკეტო დარტყმებს ახორციელებს უკრაინის მშვდობიანი ქალაქების მიმართ. ამის შესახებ მან ვიდეომიმართვაში ილაპარაკა.

პრეზიდენტის თქმით, რუსების დარტყმის სამიზნე სამხედრო ობიექტებთან ერთად საცხოვრებელი სახლებიც გახდნენ.

 „ამ შეტევის მიზანი ზეწოლაა. ზეწოლა ჩვენზე. პატივცემულო მოქალაქეებო, ეს არის ზეწოლა ჩვენს საზოგადოებაზე. ხაზს ვუსვამ: არა მხოლოდ ხელისუფლებაზე, არამედ ყველა უკრაინელზე. ჩვენმა ახალგაზრდებმა უკრაინის დამცველებმა მტერს არ მისცეს საშუალება განეხორციელებინა პირველ დღეს ოპერატიული შემოჭრის ჩანაფიქრი“, - განაცხადა ზელენსკიმ.

ზელენსკიმ აღნიშნა, რომ ეს თავდასხმები მას 1941 წელს კიევზე შეტევას ახსენებს. მისივე თქმით, დასავლეთის სანქციები არასაკმარისია.

 „ჩვენ ჩვენს სახელმწიფოს მარტონი ვიცავთ. მსოფლიოს უძლიერესი ძალები შორიდან გვაკვირდებიან. დაარწმუნა რუსეთი გუშინდელმა სანქციებმა? ჩვენ ჩვენს ცაზე და მიწაზე გვესმის, რომ ეს არასკმარისია“, - განაცხადა ზელენსკიმ.

მისი თქმით, უკრაინელების სოლიდარობას შეუძლია მათი თავისუფლების დაცვა. მან უკრაინელებს მობილიზაციისკენ, ერთმანეთისა და არმიის დახმარებისკენ მოუწოდა.

„უკრაინელების ბედი მხოლოდ თქვენზეა დამოკიდებული. ჩვენ საკუთარ მიწაზე ვართ, ჩვენს უკან სიმართლეა. ჩვენი ხასიათის განადგურება არ გამოუვათ. ჩვენი თავისუფლების წინააღმდეგ „კალიბრის“ რაკეტები უძლურია“, – აღნიშნავს ზელენსკი.

ამასთან, ზელენსკიმ განაცხადა, რომ ადრე თუ გვიან რუსეთს მოუწევს უკრაინასთან ლაპარაკი იმის შესახებ, როგორ დასრულდეს ეს ომი.

„ადრე თუ გვიან რუსეთს მოუწევს ჩვენთან ლაპარაკი. ლაპარაკი იმაზე, როგორ დავასრულოთ საომარი მოქმედებები და ეს შეჭრა. რაც უფრო მალე დაიწყება ეს ლაპარაკი, მით უფრო ნაკლები დანაკარგი ექნება რუსეთს“, - განაცხადა ზელენსკიმ.

უკრაინის ლიდერმა რუსეთის მოქალაქეებსაც მიმართა: „რუსეთის ფედერაციის ძვირფასო მოქალაქეებო, როგორც უკვე ვთქვი, დღეს ღამით დაიწყო გმირი ქალაქ კიევის საცხოვრებელი კვარტლების დაბომბვა. ეს ყველაფერი 1941 წელს მოგვაგონებს. ყველა მოქალაქე, რომელიც საპროტესტო აქციაზე გამოდის. ჩვენ თქვენ გხედავთ. ეს ნიშნავს, თქვენ ჩვენი შეისმინეთ. ეს ნიშნავს, რომ თქვენ ჩვენი გჯერათ. იბრძოლეთ ჩვენთვის, იბრძოლეთ ომის წინააღმდეგ“, – აცხადებს ზელენსკი.