პარტია "მოქალაქეების" წევრები ალეკო ელისაშვილი და ლევან იოსელიანი პარლამენტის თავმჯდომარის თანამდებობაზე შალვა პაპუაშვილის კანდიდატურას მხარს უჭერენ.

ალეკო ელისაშვილის თქმით, შალვა პაპუაშვილთან მუშაობის საინტერესო და სასიამოვნო გამოცდილება აქვს.

"მე, მასთან განათლების კომიტეტში მუშაობის გამოცდილება მაქვს. ეს იყო ძალიან საინტერესო და საქმიანი გამოცდილება. რა თქმა უნდა იყო ძალიან უსიამოვნო ინციდენტი, ამ პარლამენტში, შალვას მონაწილეობით. უშეცდომო არავინ ვართ, შეცდომები ყველას მოგვდის. ვუსურვებ შალვას, რომ ეს იყოს მის პოლიტიკურ ბიოგრაფიაში ერთადერთი ასეთი ინციდენტი. შალვა, გისურვებ რომ იყო ყველას თავმჯდომარე, ოპოზიციას მოესვლებოდეს და არ იყოს ჩარაზული კარი ოპოზიციისთვის შენს კაბინეტში და შეიქმნას საქმიანი სივრცე პარლამენტში, სადაც ვიფიქრებთ ქვეყანაზე და ქვეყნის პრობლემებზე", - განაცხადა ალეკო ელისაშვილმა.

ლევან იოსელიანის თქმით, პაპუაშვილთან თანამშრომლობის და კონსტრუქციული ურთიერთობის შესაძლებლობას ხედავს.

"ოპოზიციიდან თუ ვინმეს აქვს მასთან მუშაობის გამოცდილების ისტორია, ერთადერთი ვარ მე. ჩვენ ვიყავით თანათავმჯდომარეები საარჩევნო რეფორმის დროს. მე დავინახე შალვასგან თანამშრომლობის და კონსტრუქციული ურთიერთობის შესაძლებლობა, რაც ძალიან მნიშვნელოვანი იყო იმ დაძაბულ პერიოდში ჩვენთვის და ზოგადად იმ საარჩევნო რეფორმისთვის, რომელიც ერთად განვახორციელეთ", - განაცხადა იოსელიანმა.

შალვა პაპუაშვილის პარლამენტის თავმჯდომარედ არჩევას პარლამენტის პლენარულ სხდომაზე დღეს უყრიან კენჭს.