კარგი იქნება, თუ ბესო ზანგური სასწრაფოდ დატოვებს თეატრს, მოწოდების გარდა, არაფრის გაკეთება არ შემიძლია, – მიიჩნევს კულტურის მინისტრი თეა წულუკიანი. მისი თქმით, არა მხოლოდ ერთმა მხარემ, არამედ მეორე მხარემაც უნდა ითანამშრომლოს საგამოძიებო ორგანოსთან.

"კარგი იქნება, თუ ის ამასობაში დღესვე, სასწრაფოდ დატოვებს თეატრს, რადგან მე მოწოდების გარდა, არაფრის გაკეთება არ შემიძლია“, – განაცხადა თეა წულუკიანმა.

თეა წულუკიანმა განმარტა ისიც, ძალადობაზე საუბარი არასდროს არაა გვიან.

"გასაგებია, რომ 11 წლის წინ ქალები და არამცთუ 11 წლის წინ, რამდენიმე წლის წინაც ვერ საუბრობდნენ ღიად. სწორედ ამიტომ, „ქართული ოცნების“ ხელისუფლების ინიციატივითა და გადაწყვეტილებით, მე წილად მხვდა ყველაზე ის პატივი, რაც გულისხმობდა ევროპაში ქალზე ძალადობის წინააღმდეგ ინსტრუმენტის ხელმოწერა, ეს გახლავთ სტამბოლის კონვენცია, რომელსაც ხელი მოვაწერე 2014 წელს ყველას, ქართველი გოგონებისა და ქალების სახელით. ჩვენ მსხვერპლს ვერასდროს ვუსაყვედურებთ, რატომ არ ილაპარაკე დროზეო.

ნინუცა მაყაშვილი, მიუხედავად იმისა, რომ მიწვეული იყო საგამოძიებო ორგანოში, ის ჯერ არ მისულა. იმედია უარს არ აცხადებს, თუნდაც ფიქრობდეს, რომ 11 წლის შემდეგ გვიანია საგამოძიებო ორგანოში სიარულიო, მინდა ვუთხრა, რომ ითანამშრომლოს საგამოძიებო ორგანოებთან, ვინაიდან ეს სხვა ქალების უფლებების დაცვისთვის არის უკიდურესად მნიშვნელოვანი, – განაცხადა წულუკიანმა.