ჯეკ შეფარდის ექსტრადირება დიდ ბრიტანეთში მოხდება. შესაბამისი გადაწყვეტილება საქალაქო სასამართლო ცოტა ხნის წინ გამოიტანა. მოსამართლემ დააკმაყოფილა პროკურატურის შუამდგომლობა. რაც იმას ნიშნავს, რომ გარკვეული პროცედურების გავლის შემდეგ მოხდება შეფარდის ექსტრადირება.

სასამართლო პროცესზე დიდ ბრიტანეთში ექსტრადირებაზე თანხმობა ჯეკ შეფარდმაც განაცხადა.

დიდი ბრიტანეთის ძებნილი მოქალაქე ჯეკ შეფარდი  საქართველოში გასული წლის მარტიდან იმალებოდა. მან ბრიტანეთის  მას შემდეგ დატოვა, რაც მისი მეგობარი გოგო მისივე თქმით, უბედურ შემთხვევას ემსხვერპლა. შეფარდი ქართველ სამართალდამცავებს  23 იანვარს ჩაბარდა.

ბრიტანული მედიის ინფორმაციით, 2015 წლის 8 დეკემბერს, ჯერ შეპარდი მეგობარ გოგონასთან, 24 წლის შარლოტა ბრაუნთან ერთად, მდინარე ტემზაზე ნავით სეირნობდა. ნავის შეჯახების შედეგად ორივე მათგანი წყალში ჩავარდა. ქალი გარდაცვლილი იპოვეს, ხოლო შეფარდის გადარჩენა მოხერხდა. გაირკვა, რომ ნავი მნიშვნელოვნად დაზიანებული იყო და მასზე არც სამაშველო ჟილეტები იყო. ბრალდების მხარის მტკიცებით, ამ მდგომარეობაში ნავით წყალში გასვლა არ შეიძლებოდა.

ვიდრე ქართველ სამართალდამცავებს ჩაბარდებოდა, ჯეკ შეფარდმა ტელეკომპანია „რუსთავი 2“-ს ინტერვიუ მისცა.

„ეს იყო საშინელი ტრაგედია, რომლის დროსაც შარლოტა დაიღუპა. პოლიციაც და ხელისუფლებაც თავიდანვე ამბობდნენ, რომ ეს იყო უბედური შემთხვევა. ნავს ხარვეზები ჰქონდა, მაგრამ ჩემი დაცვის მხარის მიერ მიწვეულმა ექსპერტებმა დაადგინეს, რომ ეს დაზიანებები მას წყლიდან ამოტანის დროს გაუჩნდა. ასე რომ, ეს იყო უბედური შემთხვევა. ავარიის დროს შარლოტა მართავდა ნავს, მაგრამ ეს ფაქტი დაივიწყეს და მედიასაც აღარ უხსენებია. დაწერეს, რომ მე ვმართავდი. ეს არ არის სიმართლე და სასამართლოსაც აღიარებული აქვს, მაგრამ პრესამ დაწერა, რომ მე დავუშვი, დაღუპულიყო“, – განაცხადა შეფარდმა.

შეფარდი ბრიტანეთის სასამართლომ დაუსწრებლად არაგანზრახ მკვლელობაში დამნაშავედ სცნო.