ჩვენ ნამდვილად არ გვიხარია და არ გვინდა ადგილი გაყალბების ფაქტებს ჰქონდეს. ძალიან კარგი იქნება, თუ ეს ფაქტები არ დადასტურდება, რადგან თუ დადასტურდა, მაშინ სახეზე გვაქვს რაღაც წინასაარჩევნო სერიოზული დარღვევასთან, რომელიც ძალიან პრობლემატურია, -ამის შესახებ„სამართლიანი არჩევნებისა და დემოკრატიის საერთაშორისო საზოგადოების“ ხელმძღვანელმა  მიხეილ ბენიძემ განაცხადა.

მისი თქმით, სერვისების განვითარების სააგენტოს კონკრეტული თანამდებობის პირის მხრიდან მათთან გამოჟონილი ინფორმაციის სხვადასხვა ასპექტი საკმაოდ სარწმუნო იყო.

„დანარჩენ ნაწილზე გამოძიება უნდა წარიმართოს და მნიშვნელოვანია, კითხვებს პასუხი გაეცეს. ჩვენ დამალული ინფორმაცია არ გაგვაჩნია. რა ინფორმაციაც გვაქვს, საჯაროდ ვსაუბრობთ და ზუსტად ეს ინფორმაცია მიეწოდება მათ შორის გამოძიებას“, – განაცხადა მიხეილ ბენიძემ.

ბენიძის განცხადებით, არ საუბრობენ, რომელი ტიპის პირადობის მოწმობებზეა საუბარი.

„ჩვენ კონკრეტულმა წყარომ რა ინფორმაცია მოგვაწოდა, ამ ინფორმაციის ნაწილის გადამოწმება შევძელით, რაც კონკრეტული თანამდებობის პირებს და ამ თანამდებობის პირების მივლინებებს ეხებოდა. ასევე, ჩვენ შევეცადეთ დაგვედგინა, სად არის შესაძლებელი კონკრეტული ID ბარათები დამზადდეს. მართალია ბიომეტრიული ID ბარათების დამზადება, როგორც ჩანს, ყველა ტერიტორიულ ერთეულში შესაძლებელი არ არის. თუმცა ძველი სტილის, ლამინირებული პირადობის მოწმობების დამზადება უფრო მეტ ლოკაციაზეა შესაძლებელი. მე არ ვამბობ, რომელ პირადობებზეა საუბარი. ჩვენი ინფორმაციით, ეს ლამინირებული პირადობები ცალკეულ შემთხვევებში კიდევ მზადდება და ამის შესაძლებლობა არის. ეს ჩვენთან საუბრისას სხვადასხვა წყაროებმა თვითონ დაადასტურეს.

თუ რაღაც გაყალბების მექანიზმზეა სუბარი, მაშინ ბუნებრივია, გვერდის ავლა ხდება იმ ოფიციალური პროცედურების, რა პროცედურებითაც წესით უნდა იბეჭდებოდეს ეს დოკუმენტები. ამიტომ, ეს არის სწორედ გამოძიების დასადგენი საკითხი. ეს არის ის, რაც ჩვენს შესაძლებლობებს სცდება, რომ დავადგინოთ. თითოეულ ტერიტორიულ ერთეულში და სხვადასხვა მუნიციპალიტეტებში ვერ შევალთ და ვერ დავადგენთ, ვინ რას საქმიანობს. ეს სწორედ ის საკითხია, სადაც გამოძიების ჩართულობა მნიშვნელოვანია. იმედი მაქვს, რო გამოძიება ამ ყველაფერს პასუხს გასცემს.

ჩვენ ნამდვილად არ გვიხარია და არ გვინდა ადგილი გაყალბების ფაქტებს ჰქონდეს. ძალიან კარგი იქნება, თუ ეს ფაქტები არ დადასტურდება, რადგან თუ დადასტურდა, მაშინ სახეზე გვაქვს რაღაც წინასაარჩევნო სერიოზული დარღვევასთან, რომელიც ძალიან პრობლემატურია“, – განაცხადა მიხეილ ბენიძემ.

სამი არასამთავრობო ორგანიზაციის – „საერთაშორისო გამჭვირვალობა-საქართველოს“, ახალგაზრდა იურისტთა ასოციაციისა და „სამართლიანი არჩევნების“ განცხადებით, გასულ კვირას სახელმწიფო სერვისების განვითარების სააგენტოში დასაქმებულმა ერთ-ერთმა თანამშრომელმა მათ სააგენტოს მიერ სავარაუდოდ ყალბი პირადობის მოწმობების დამზადების შესახებ მიაწოდა ინფორმაცია. მათ არჩევნების სავარაუდო გაყალბების ფაქტზე გამოძიების დაწყება მოითხოვეს. არასამთავრობო ორგანიზაციების მიერ გავრცელებულ ინფორმაციასთან დაკავშირებით, საქართველოს მთავარ პროკურატურაში გამოძიება დაიწყო გასაღების ან გამოყენების მიზნით ყალბი პირადობის მოწმობების შესაძლო დამზადების ფაქტზე დაიწყო.