პაკისტანის ხელისუფლებამ ქრისტიანი ქალის ასია ბიბის გათავისუფლება დროებით გადადო. ბიბის სიკვდილით დასჯა ჰქონდა მისჯილი მუჰამედის შეურაცხყოფისთვის, რომელიც ცოტა ხნის წინ უმაღლესმა სასამართლომ გააუქმა.

Associated Press-ის ცნობით, მუსულმანები ბიბის გათავისუფლებას აპროტესტებენ და მის სახალხოდ ჩამოხრჩობას მოითხოვენ.

დემონსტრანტებმა ავტომაგისტრალები გადაკეტეს, რამაც მოძრაობის პარალიზება გამოიწვია.

ხელისუფლებამ იმ ციხის დაცვა გააძლიერა, სადაც ბიბი იმყოფება. საპატიმროს თანამშრომლებმა გუშინ ორი პატიმარი დააკავეს, რომლებიც ბიბის დახრჩობას ცდილობდნენ.

ოქტომბერში დიდი ბრიტანეთიდან ორ შვილთან ერთად პაკისტანში დაბრუნდა ბიბის ქმარიც. გავრცელებული ცნობით, ასია ბიბის თავშესაფარი ეპანეთმა და საფრანგეთმა შესთავაზა, თუმცა ოჯახს ჯერ არ  გადაუწვეტია სად იცხოვრებს, ბიბის გათავისუფლების შემდეგ.

ბიბი 2010 წელს დამნაშავედ ცნეს წინასწარმეტყველ  მუჰამედის შეურაცხყოფისათვის, რაც პაკისტანის კანონმდებლობით სასჯელის უმაღლეს ზომას ითვალისწინებს.

ბრალი მას 2009 წელს წაუყენეს. იმ დროს ჩხუბი მოხდა ბიბისა და  მუსულმან ქალებს შორის, რომლებთანაც ბიბი მუშაობდა.

გამოძიების ფარგლებში ბიბიმ განაცხადა, რომ ქალები მას სიტყვიერ შეურაცხყოფას აყენებდნენ იმასთან დაკავშირებით, რომ ის ქრისტიანი იყო, რის პასუხადაც ბიბიმ  მუჰამედი შეურაცხმყოფელი სიტყვებით რამდენჯერმე მოიხსენია. მისი თქმით, ჩხუბიდან რამდენიმე დღის შემდეგ მას მუსულმანებმა სცემეს.