„ნუ ასარდაფებ“, „მოძალადე ხელისუფლება ციხეში“, - აქცია-მსვლელობა გორში გაიმართა.

მოქალაქეები საყვირებით, ტრანსფარანტებით და შეძახილებით „ქართული ოცნების“ გორის რაიონულ ოფისთან მივიდნენ და ის სკანდალური აუდიოჩანაწერის შინაარსი გააპროტესტეს, რომელიც გუშინ „რუსთავი 2“-ის ეთერში გავიდა.

მოსახლეობა ენმ-ის წარმომადგენლებთან ერთად აპროტესტებს ხელისუფლების ქმედებებს, რომელზეც აუდიოჩანაწერში, სავარაუდოდ, მირზა სუბელიანი საუბრობდა. ჩანაწერიდან ირკვევა, რომ სასურველი ჩვენებების მიცემის მიზნით მოწმეებს იტაცებდნენ და ფიზიკურად უსწორდებოდნენ, ასევე აწამებდნენ.

სუბელიანი ჩანაწერში ამბობს, რომ მოქმედი ხელისუფლების წინააღმდეგ აქვს უმძიმესი კომპრომატები, მათ შორის, საუბარია ადამიანთა გატაცებასა და წამებაზე.

სუბელიანი ამბობს, რომ ის „შავ საქმეებს“ აგვარებდა, რაც ხელისუფლებამ ვერ დაუფასა. სუბელიანის თქმით, მას ბევრი კომპრომატი აქვს ხელისუფლების წარმომადგენლების საწინააღმდეგოდ. სუბელიანი ასევე, აღნიშნავს, რომ პროკურატურას ოთარ ფარცხალაძე არაფორმალურად მართავს.