თუ გამოიკვეთება რაიმე კონკრეტული ბრალეულობა და იარსებებს ბრალის დადასტურების პირდაპირი მტკიცებულება, პირველი ვიქნები, ვინც მ.კ.-ს დევნას დაიწყებს განზრახ მკვლელობაში თანამონაწილეობისთვის,” - ეს განცხადება თბილისის პროკურორის მოადგილემ, კონსტანტინე სირაძემ „ხორავას ქუჩის“ საქმეზე შექმნილი საგამოძიებო კომისიის სხდომაზე გაკეთა. მას სხდომაზე დაუსვეს კითხვა, თუ რატომ არ წარედგინა ბრალი კალანდიას მკვლელობაში თანამონაწილეობისთვის. “ამ გარემოებებზე მე მქონდა საუბარი ზაზა სარალიძესთან, როცა მას შევხვდი. ამ კონკრეტული გარემოებით, ბრალდების მხარეს არ ჰქონდა მტკიცებულებითი სტანდარტი, რომ მ.კ.-ს ქმედება შეფასებულიყო ჯგუფურად განზრახ მკვლელობის თანამონაწილეობად. ახლაც მიმდინარეობს გამოძიება, თუ გამოიკვეთება რაიმე კონკრეტული ბრალეულობა და იარსებებს პირდაპირი მტკიცებულება, რაც მე, როგორც პროკურორს, მომცემს საშუალებას ბრალის დადასტურების, პირველი ვიქნები, ვინც დევნას დაიწყებს მ.კ.-ს მიმართ, განზრახ მკველობაში თანამონაწილეობისთვის,“ - განაცხადა სირაძემ.

ხორავას ქუჩაზე მკვლელობის საქმეზე დროებითი საპარლამენტო საგამოძიებო კომისიაში დღეს პროკურატურის წარმომადგენლების გამოკითხვა მიმდინარეობს. კომისიის წევრების კითხვებს უსვამენ მთავარი პროკურორის პირველ მოადგილე მამუკა ვასაძეს, მთავარი პროკურორის მოადგილე გიორგი გაბიტაშვილს, ქალაქ თბილისის პროკურორ მალხაზ კაპანაძესა და თბილისის პროკურორის მოადგილე კონსტანტინე სირაძეს.