დანიელმა გამომგონებელმა პეტერ მადსენმა აღიარა, რომ შვედი ჟურნალისტის კიმ ვალის ცხედარი თავის წყალქვეშა ნავზე დაანაწევრა, თუმცა მისი მკვლელობის აღიარებაზე უარი თქვა.

მადსენმა ასევე აღიარა, რომ ჟურნალისტის ცეხდრის ფრაგმენტები ზღვაში გადაყარა.

46 წლის გამომგონებლის თქმით, ვალი მისი წყალქვეშა ნავის ბორტზე  მხუთავი აირით - ნახშირბადის მონოქსიდით მოიწამლა. ამ დროს თავად მადსენი გემბანზე იმყოფებოდა.

მანამდე გამომგონებელი ამტკიცებდა, რომ გოგონა თავში მძიმე ლუქის დაცემის შედეგად დაიღუპა. ამასთან ის უარყოფდა მისი ცხედრის დანაწევრებას.  

ოქტომბრის დასაწყისში კოპენჰაგენთან ახლოს, კოგეს ყურეში რამდენიმე ჩანთა იპოვეს. ჩანთებში აღმოჩნდა ჟურნალისტის მოჭრილი თავი, კიდურები და ტანსაცმელი, ასევე ლითონის ნაჭრები, რათა ჩანთები სწრაფად ჩაძირულიყო.

ვალის ცხედარი 21 აგვისტოს იპოვეს. ექსპერტიზის დროს სხეულზე აღმოაჩინეს დანით მიყენებული ჭრილობები.

თავდაპირველად მადსენი ამტკიცებდა, რომ გოგონა კოპენჰაგენში გადასვა. მოგვიანებით მან ჩვენება შეცვალა და განაცხადა, რომ ზღვაში საშინელი ტრაგედია მოხდა, მან ვალი ზღვაში გადააგდო და თვითმკველობას გეგმავდა.

ამის გარდა დანიის პროკურორმა ოქტომბრის დასაწყისში განაცხადა, რომ მადსენის კუთვნილ დისკზე აღმოჩნდა კადრები, რომლებზეც თავმოკვეთილი ქალების ცხედრებია აღბეჭდილი. მადსენის თქმით, დისკი მას არ ეკუთვნოდა.