ამერიკელი სენატორის ბენ კარდინის თქმით, თურქეთის მიერ რუსული ანტისარაკეტო სისტემების შეძენის გამო, ანკარას, შესაძლოა, სანქციები დაუწესდეს, - ამის შესახებ ნათქვამია წერილში, რომელიც სენატის საგარეო ურთიერთობათა კომიტეტის გავლენიანმა წევრმა ტრამპის ადამინისტრაციას მისწერა. 

მისი თქმით, რუსეთთან დადებული გარიგება აშშ-ის კონგრესის მიერ გასულ თვეს მიღებულ კანონს ეწინააღმდეგება. კარდინის, თქმით კანონში გარკვევით წერია, რომ სანქციები უნდა დაწესდეს ყველა იმ სახელმწიფოს წინააღმდეგ, რომელიც რუსეთის სამხედრო და სადაზვერვო სფეროში მნიშვნელოვან ტრანზაქციას განახორციელებს.

თავის წერილში კარდინი ითხოვს, ვაშინგტონში შეაფასონ, როგორ შეიძლება აისახოს რუსეთ-თურქეთის გარიგება თურქეთის NATO-ს წევრობაზე და აშშ-ის მხრიდან ანკარას სამხედრო დახმარებაზე.

თურქეთმა რუსეთისგან ანტისარაკეტო სისტემა S-400-ების შეძენის თაობაზე, 2,5 მილიარდ დოლარად შეფასებული გარიგების დასრულების შესახებ რამდენიმე დღის წინ განაცხადა. თურქეთის ლიდერის თქმით, არავის აქვს უფლება, თურქეთის დამოუკიდებელ გადაწყვეტილებაზე ზეგავლენა მოახდინოს.