ჩრდილოეთ კორეამ ბალისტიკური რაკეტის მორიგი გამოცდა ჩაატარა. რაკეტამ იაპონიის კუნძულებს გადაუფრინა და წყნარ ოკეანეში დაეშვა. სამხრეთ კორეის სამხედროების ინფორმაციით, რაკეტის გაშვება ფხენიანიდან მოხდა. რაკეტამ 3,7 ათასი კილომეტრის მანძილი დაფარა. 

სამხრეთ კორეის პრეზიდენტმა მუნ ჩჟე ინმა სამხედროებს საბრძოლო მზადყოფნის ამაღლების თაობაზე ბრძანება მისცა. უცხოური მედიის ინფორმაციით, აღნიშნული ჩრდილოეთ კორეის მიერ ბალისტიკური რაკეტის გამოცდას მოჰყვა. 

„საჭიროა ეფექტური, მკაცრი ზომების მიღება, რათა ჩრდილოეთ კორეის მხრიდან მომავალ საფრთხეებს დავუპირისპირდეთ“, - აღნიშნა სამხრეთ კორეის პრეზიდენტმა. 

მუნ ჩჟე ინმა სამხედროებს ასევე მოუწოდა მზადყოფნის ამაღლებისკენ ფხენიანის მიერ ბიოლოგიური და ქიმიური იარაღის შესაძლო გამოყენების ფონზე.