სახელმწიფო აუდიტის სამსახურის დასკვნის მიხედვით, ვეტერანთა სამსახურის ყოფილმა უფროსმა ირაკლი შიხიაშვილმა 13 463 ვეტერანის პერსონალური მონაცემები 2016 წელს, ნიდერლანდების სამეფოში რეგისტრირებულ „ფორტუნა ჰოლდინგს“ გადასცა.

აუდიტის დასკვნაში აღნიშნულია, რომ 2015 წლის 21 ივლისს საჯარო რეესტრში რეგისტრირდება შპს „ჯორჯიან ფორ ვეტერანსი“, რომლის 100%-იანი წილის მფლობელია „ფორტუნაჰოლდინგი“. საჯარო რეესტრში კომპანიის რეგისტრაციიდან სამი დღის შემდეგ, კომპანიასა და ვეტერანთა სამსახურს შორის ფორმდება თანაშრომლობის ხელშეკრულება, რომელიც ითვალისწინებს „ვეტერანთა კლუბის“ დაფუძნებას და მართვას. კლუბს ვეტერანებისთვის უნდა დაეფინანსებინა სხვადასხვა აქტივობა, რაც აუდიტის სამსახურის დასკვნიდან ირკვევა, რომ არ განხორციელებულა, თუმცა კომპანიის ხელში მაინც აღმოჩნდა საქართველოს ტერიტორიული მთლიანობისთვის მებძოლი ათასობით ვეტერანის პერსონალური მონაცემები. საკითხს უკვე სწავლობს პერსონალურ მონაცემთა დაცვის ინსპექტორის აპარატი.