ყოფილმა ფილიპინელმა პოლიციელმა 300 ადამიანის მკვლელობა აღიარა. ამის შესახებ სააგენტო ”როიტერი” იუწყება.

თებერვალში არტურო ლასკანასმა სენატის მოსმენაზე განაცხადა, რომ, პრეზიდენტი როდრიგო დუტერტე ქალაქ დავაოს მერად ყოფნის დროს ე.წ. ”განადგურების გუნდის” წევრებს ფულს აძლევდა და დამნაშავეების მოკვლას ავალებდა.

დღეს სენატის მოსმენაზე ლასკანასის ახალი აღიარება მოისმინეს. მისი თქმით, პირადად 300 ადამიანი ჰყავს მოკლული, აქედან 200 ”განადგურების გუნდში”  ყოფნისას მოკლა. უკანასკნელი მკვლელობა 2015 წელს ჩიადინა. ლასკანასმა ასევე განაცხადა, რომ დუტერტეს დაცვის დავალებით მოკლა მისი ორი ოპონენტი.

მაისში არჩეული პრეზიდენტი დუტერტემ ნარკოდამოკიდებულებსა და ნარკოგამავრცელებლებს ფართომასშტაბიანი ომი გამოუცხადა. გაეროს ბოლო მონაცემებით, დუტერტეს ხელისუფლებაში მოსვლის მომენტიდან ქვეყანაში ნარკოვაჭრობასთან კავშირში მყოფი  6 ათასი ადამიანი მოკლეს, მათ შორის გამოძიების პროცესში.  

ასევე ფილიპინების პრეზიდენტმა განაცხადა, რომ ეჭვმიტანილებს პირადად კლავდა, როდესაც ქალაქ დავაოს მერი იყო და ახლაც მზად არის კორუმპირებული ჩინოვნიკები ვერტმფრენებიდან გადაყაროს, როგორც ამას წარსულში აკეთებდა ისე, რომ თავის ქმედებებში ეჭვი არასდროს შეპარვია.