"უფრო ლოგიკური ხომ არ იქნებოდა, კონსტიტუციაში საქართველოს პრეზიდენტის, მედიისა და საზოგადოებისთვის ხასიათის გამოვლენის აკრძალვის ვალდბეულება ჩაგვეწერა?",- ასე პასუხობს პრეზიდენტის ადმინისტრაციის ხელმძღვანელი გიორგი აბაშიშვილი პარლამენტის თავმჯდომარის ირაკლი კობახიძის განცხადებას პრეზიდენტის არჩევის წესთან დაკავშირებით.

მისი თქმით, ირაკლი კობახიძის განცხადება გულისხმობს, რომ კონსტიტუცია უნდა იცვლებოდეს არა ანალიზზე დაყრდნობით, არამედ პრეზიდენტის კომენტარის ხასიათიდან გამომდინარე.

"საკონსტიტუციო კომისიის თავმჯდომარემ გაგვაცნო მისეული ხედვა ქვეყანაში მიმდინარე კონსტიტუციურ პროცესებთან დაკავშირებით. მისი თქმით, ქვეყანაში კონსტიტუცია უნდა იცვლებოდეს არა ფუნდამენტურ ანალიზზე დაყრდნობით, არამედ პრეზიდენტის კომენტარების ხასიათიდან გამომდინარე. თუ კომენტარის ხასიათიდან გამომდინარე უნდა იცვლებოდეს საკონსტიტუციო მოდელები ქვეყანაში, მაშინ უფრო ლოგიკური ხომ არ იქნებოდა, საქართველოს კონსტრტიტუციაში პირდაპირ ჩაგვეწერა ხასიათის გამოვლენის აკრძალვის ვალდებულება საქართველოს პრეზიდენტის, მედიისა და საზოგადოებისათვის?",- განაცხადა გიორგი აბაშიშვილმა.

ცნობისთვის, ირაკლი კობახიძემ პრეზიდენტის არჩევს წესთან დაკავშირებით გიორგი მარგველაშვილის განცხადება არაკორექტულად შეაფასა და განაცხადა, რომ თუ მარგველაშვილი ასეთი ტიპის განცხადებების გაკეთებას გააგრძელებს, შესაძლოა მომავალ წელს პრეზიდენტის არჩევნები არაპირდაპირი წესით ჩატარდეს.