წელს ბათუმს ახალი ნაძვის ხე ექნება. ნაძვის ხის კონსტრუქციის მონტაჟი დღეს ევროპის მოედანზე დაიწყო, სადაც იმყოფებოდნენ აჭარის ა.რ. მთავრობის თავმჯდომარე ზურაბ პატარაძე, ბათუმის ვიცე-მერი ბაგრატ მანველიძე და მერის მოადგილე ალექსანდრე მითაიშვილი.

ბათუმის მთავარი ნაძვის ხე 25 დეკემბერს, ევროპის მოედანზე საზეიმოდ აინთება. 22 მეტრი სიმაღლისა და 11 მეტრი დიამეტრის ნაძვის ხე წითელი, მწვანე და ოქროსფერი სათამაშოებით, წითელი ბაფთებითა და ლედ ნათურებით მოირთვება. წელს ქუჩებსაც ახალი განათებები დაემატება და კონუსის ფორმის ახალი სათამაშოებით მოირთვება. მერიის მიერ დაგეგმილი საახალწლო ღონისძიებები ევროპის მოედანზე 25-დან 31 დეკემბრის ჩათვლით ჩატარდება.

დაგეგმილია სხვადასხვა კულტურული, გასართობი და საბავშვო ღონისძიება. 7 იანვარს კი ბათუმის ხელოვნების ცენტრში საშობაო კონცერტი გაიმართება. რაც შეეხება საახალწლო გალა კონცერტს, ის ტრადიციულად 31 დეკემბრის ღამეს, ევროპის მოედანზე გაიმართება.
,,უამნდობის გამო დღემდე ვერ ხერხდებოდა ახალი ნაძვის ხისა და საახალწლო განათებების ბათუმის პორტში შემოტანა. დღესვე დაიწყება ქალაქის მთავარი ნაძვის ხის სამონტაჟო სამუშაოები და 25 დეკემბერს, ევროპის მოედანზე საზეიმოდ განათდება. რაც შეეხება საახალწლო ღონისძიებებს, იქნება ძალიან საინტერესო და მრავალფეროვანი“ – განაცხადა ალექსანდრე მითაიშვილმა.