საქართველოს საკონსტიტუციო სასამართლოს თავმჯდომარის გიორგი პაპუაშვილის განცხადების შემდეგ, მას პრემიერ-მინისტრი ტელეფონით დაუკავშირდა და შესთავაზა მაქსიმალურად მოკლე პერიოდში პროკურატურას მიაწოდოს მის ხელთ არსებული ინფორმაცია, - ამის შესახებ გიორგი კვირიკაშვილმა ჟურნალისტებთაბ საუბარში განაცხადა.

"პაპუაშვილის განცხადების მერე, სულ რაღაც ერთი საათის განმავლობაში, მე დავუკავშირდი ტელეფონით გიორგი პაპუაშვილს. ვესაუბრე გენერალურ პროკურორსაც. შევთავაზე პაპუაშვილს, რომ მაქსიმალურად მოკლე პერიოდში პროკურატურას მიაწოდოს ინფორმაცია, რასაც ის ფლობს. მთავარ პროკურორსაც ვესაუბრე და ისინი ჩაიბარებენ ჩვენებას",- განაცხადა პრემიერმა.

მისივე თქმით უახლოეს პერიოდში შესაძლებელია გიორგი პაპუაშვილს შეხვდეს.

"მე არანაირი პრობლემა არ მაქვს პაპუაშვილთან შეხვედრის. უახლოეს პერიოდში შესაძლებელია ჩვენ შევხვდეთ, მაგრამ დრო რომ არ დავკარგოთ, კარგი იქნება ყველა იმ ადამიანმა, რომელსაც რაიმე პრობლემა გააჩნია, მიმართოს პროკურატურას", -აღნიშნა პრემიერ-მინისტრმა.

საკონსტიტუციო სასამართლოს თავმჯდომარე გიორგი პაპუაშვილის განცხადებით, საკონსტიტუციო სასამართლოს მოსამართლეებზე მიზანმიმართული ზეწოლა მიმდინარეობს.