გია ხუხაშვილი: გიორგი კვირიკაშვილი არ არის პოლიტიკური ფიგურა (ვიდეო)

„ჩვენ არ გვინახავს გიორგი კვირიკაშვილის პოლიტიკური გადაწყვეტილებები. მას ჯერ არც ერთი გადაწყვეტილება არ მიუღია“, ამის შესახებ განცხადება ბიძინა ივანიშვილის ყოფილმა მრჩეველმა, გია ხუხაშვილმა გუშინ, მეორე არხის თოქ-შოუ „არგუმენტების დროში" გააკეთა.

„სიტყვების საქართველოში უკვე არავის სჯერა. ჩვენ ის უნდა ვნახოთ ქმედებებში. მან უნდა დაგვანახოს, რომ შეუძლია გადაწყვეტილებების მიღება, თუმცა ამის შანსი დიდწილად უკვე გაუშვა. ასეთი ხანგრძლივი პაუზა შეცდომაა. მან არ იცის როგორ აიღოს ძალაუფლება. პრობლემა იმაში კი არ არის რომ მას ვინმე ამ ძალაუფლებას არ აძლევს. დარწმუნებული ვარ ბიძინა ივანიშვილი სიამოვნებით დაუთმობდა მას ძალაუფლებას, მგრამ კვირიკაშვილმა უბრალოდ არ იცის რა აიღოს და როგორ დაალაგოს ვერტიკალი. მას არ აქვს პოლიტიკის გამოცდილება და ვფიქრობ არც ინტერესი აქვს. რა ცხოვრებითაც ის ახლა ცხოვრობს არ არის მისი რეალური ცხოვრება. ის ძალიან გაერთო იმით, რომ ადამიანურად ყველას მოსწონს და არავინ განსაკუთრებით არ უტევს. ეს ერთ მხრივ კარგია, მაგრამ მეორე მხრივ ეს არის ძალიან ცუდი.  შეიძლება არ გიტევენ იმიტომ, რომ არავის არაფრად არ მიაჩნიხარ. ადამიანი რომელიც არ მოქმედებს მას არავინ უტევს“, - განაცხადა გია ხუხაშვილმა.