ლევან ბერძენიშვილი: არ მგონია, ირაკლი ღარიბაშვილი მოვიდეს

"რესპუბლიკური პარტიის" ერთ-ერთი ლიდერი ლევან ბერძენიშვილი ვარაუდობს, რომ ყოფილი პრემიერ-მინისტრი ირაკლი ღარიბაშვილი პარტია "ქართულ ოცნებაში" არ დაბრუნდება, თუმცა აქვე დასძენს, რომ მას მხოლოდ საკუთარ პარტიში მიმდინარე მოვლენებზე აქვს ზუსტი ინფორმაცია.

"ეს არ არის ჩვენი პრობლემა, თუ "ქართული ოცნება" ხედავს ალბათობას, დაელაპარაკება, თუ ვერ ხედავს არ დაელაპარაკება, ჩვენ ამას ვერ ვხედავთ. "რესპუბლიკელების" სიაში ის არ ყოფილა და ვერ იქნება. ბატონმა კალაძემ თქვა, რომ არ განიხილება. ბატონმა კობახიძემ თქვა, რომ შესაძლოა განიხილებოდეს. მე არ მგონია, რომ ბატონი ირაკლი ღარიბაშვილი იმიტომ წავიდა, რომ მოვიდეს, მაგრამ ეს მათი საქმეა და არავინ არაფერში არ ჩაერევა, როგორც უნდა ისე გადაწყვიტონ", - აღნიშნა ბერძენიშვილმა.

შეგახსენებთ, მედიაში გავრცელდა ინფორმაცია ყოფილი პრემიერ-მინისტრის ირაკლი ღარიბაშვილის ,,ქართული ოცნების“ საარჩევნო სიაში ყოფნის შესახებ.