მომდევნო რამდენიმე დღე გადამწყვეტია უკრაინის ფინანსური მხარდაჭერისთვის - 2026-2027 წლებში უკრაინის საჭიროებები 137 მილიარდ ევროს შეადგენს - ურსულა ფონ დერ ლაიენი

ევროკომისიის პრეზიდენტმა ურსულა ფონ დერ ლაიენმა აღნიშნა, რომ ევროკავშირმა უკრაინისთვის ფინანსური დახმარების შესახებ გადაწყვეტილება დეკემბრის სამიტზე უნდა მიიღოს. ამის შესახებ მან 18-19 დეკემბრის ევროკავშირის სამიტამდე გამართული პლენარული დებატების წინ განაცხადა.

ფონ დერ ლაიენმა აღნიშნა, რომ უკრაინის თავდაცვის მხარდაჭერა ყველაზე მნიშვნელოვანი, რაც ევროპამ უნდა გააკეთოს საკუთარი თავდაცვისთვის.

„ამის უზრუნველსაყოფად მომდევნო რამდენიმე დღე გადამწყვეტი იქნება. ჩვენ უნდა ავირჩიოთ, თუ როგორ დავაფინანსებთ უკრაინის ბრძოლას. ჩვენ ვიცით, რომ ეს გადაუდებელი აუცილებლობაა“, - აღნიშნა ევროკომისიის პრეზიდენტმა.

მან აღნიშნა, რომ ევროკომისიისა და სავალუტო ფონდის შეფასებით, 2026-2027 წლებში უკრაინის საჭიროებები დაახლოებით 137 მილიარდ ევროს შეადგენს

„ევროპამ ორი მესამედი უნდა დაფაროს - ეს 90 მილიარდი ევროა. და ეს მხოლოდ ციფრებს არ ეხება - ასევე ეხება უკრაინის უნარის გაძლიერებას, უზრუნველყოს რეალური მშვიდობა - სამართლიანი, მდგრადი, რომელიც დაიცავს როგორც უკრაინას, ასევე ევროპას. და ეს ასევე ეხება რუსეთისთვის ამ ომის ფასის გაზრდას“, - აღნიშნა ფონ დერ ლაიენმა.

„მე შემდეგი ევროპული საბჭოს შეხვედრისთვის ორი ვარიანტი შევთავაზე: [რუსულ] აქტივებზე დაფუძნებული გადაწყვეტა და ევროკავშირის სესხებზე დაფუძნებული გადაწყვეტა. ჩვენ მოგვიწევს ავირჩიოთ, რომელი გზის გავლა გვინდა. მაგრამ ძალიან ნათელია, რომ უკრაინის დაფინანსებასთან დაკავშირებით გადაწყვეტილება მომდევნო ორი წლის განმავლობაში ევროპული საბჭოს ამ შეხვედრაზე უნდა მივიღოთ“, - ხაზგასმით აღნიშნა ევროკომისიის პრეზიდენტმა.