რუსეთის ქალაქ ვოლგოგრადის ნავთობგადამამუშავებელ ქარხნაზე უკრაინული დრონებით თავდასხმა განხორციელდა

14 აგვისტოს ღამეს, უკრაინულმა დრონებმა რუსეთის ქალაქ ვოლგოგრადს შეუტიეს. იერიშის დროს,ნავთობგადამამუშავებელი ქარხნის ტერიტორიაზე აფეთქებები მოხდა, რის შემდეგაც ხანძარი გაჩნდა.

ინფორმაციას ვოლგოგრადის ოლქის გუბერნატორი ანდრეი ბოჩაროვი ავრცელებს.

„ვოლგოგრადის ოლქში ნავთობგადამამუშავებელ ქარხანაში ხანძარი და ნავთობპროდუქტების გაჟონვა მოხდა თავდასხმის შემდეგ უპილოტო საფრენი აპარატის ნამსხვრევების ჩამოვარდნის გამო“, - განაცხადა გუბერნატორმა.

თავდასხმის გამო, „როსავიაციამ“ დროებით დახურა ადგილობრივი აეროპორტი.

ქარხანა  „ლუკოილ-ვოლგოგრადნეფტეპერერაბოტკა“ რუსეთის ფედერაციის სამხრეთ ფედერალურ ოლქში ნავთობპროდუქტების უმსხვილესი მწარმოებელია, რომლის სიმძლავრე 14.8 მილიონი ტონაა.

უკრაინული დრონები ვოლგოგრადში სამიზნეებს ზედიზედ მეორე ღამეა ესხმიან თავს.

ცნობისათვის. დრონებმა ამ ნავთობგადამამუშავებელ ქარხანაზე უკვე ორჯერ მიიტანეს იერიში - მიმდინარე წლის 31 იანვარს და 3 თებერვალს, რის შემდეგაც მან მუშაობა შეწყვიტა.