სააკაშვილი არის უცხო ქვეყნის სპეცსამსახურების პროექტი, რომელიც ხორციელდება საქართველოში, ამიტომ მისი ყველა აქტიურობა ასე უნდა დავინახოთ - შალვა პაპუაშვილი

მიხეილ სააკაშვილი არის უცხო ქვეყნის სპეცსამსახურების პროექტი, რომელიც ხორციელდება საქართველოში, მისი ყველა აქტიურობა ასე უნდა დავინახოთ, – ამის შესახებ საქართველოს პარლამენტის თავმჯდომარე შალვა პაპუაშვილმა განაცხადა.

„სააკაშვილს რაც შეეხება, ბოლო გამოძიებებიდან გამომდინარეც, ჩვენ ვხედავთ, რომ სუს-მა კიდევ ერთხელ დაასახელა უკრაინის კონტრდაზვერვის მოადგილე, გია ლორთქიფქნიძე, როგორც საქართველოში არეულობების ერთ-ერთი ორგანიზატორი. ის ასევე ბრალდებულია, რომ ორგანიზატორი იყო სააკაშვილის შემოპარვისა. მიხეილ სააკაშვილი არის სრულად უცხო ქვეყნის სპეცსამსახურების პროექტი, რომელიც ხორციელდება საქართველოში, ამიტომ მისი ყველა აქტიურობა ასე უნდა დავინახოთ. ეს არის ჩარევა საქართველოს შიდა პოლიტიკაში, მით უმეტეს, რომ სააკაშვილი ამ ქვეყნის მოქალაქე არ არის“, – განაცხადა პაპუაშვილმა.

საქართველოს ყოფილმა პრეზიდენტმა, მიხეილ სააკაშვილმა სოციალურ ქსელში დაწერა: „2012 წლის 2 ოქტომბერი ისტორიაში შევა არა როგორც „ქართული ოცნების“, არამედ ქართველი ხალხისა და პირადად ჩემი გამარჯვების დღედ“. სააკაშვილი ასევე წერს: „ჩვენი ამოცანაა: გადავარჩინოთ საქართველო და შევქმნათ ძლიერი სახელმწიფო, რომელსაც ვერანაირი გარე ძალა და ოლიგარქები ვერ დაეპატრონებიან. მზად ვარ, თქვენთან ერთად დავწერო თანამედროვე ქართული სახელმწიფოს ისტორიის მომდევნო თავი“.