სტოკჰოლმში ყურანის დაწვის გამო, ბაღდადში შვედეთის საელჩოს ტერიტორიაზე ასობით ადამიანი შეიჭრა

ერაყის დედაქალაქ ბაღდადში შვედეთის საელჩოზე ასობით ადამიანმა იერიში მიიტანა, ისინი სტოკჰოლმში ყურანის დაწვის გამო პროტესტის ნიშნად შეიკრიბნენ. იუწყება SVT.

შიიტების გავლენიანმა ლიდერმა მოქტადა ას-სადრიმ თავის მიმდევრებს ქუჩაში გამოსვლისა და ყურანის დაწვის გამო პროტესტის გამოხატვისკენ მოუწოდა, ამის შემდეგ მისი მიმდევრები ბაღდადში შვედეთის საელჩოსკენ გაემართნენ.

სოციალურ ქსელებში გავრცლებულ ვიდეოში ჩანს ადამიანთა დიდი რაოდენობა როგორც შენობასთან, ისე საელჩოს კომპლექსის შიგნით. მედიის ცნობით, შვედეთის საელჩოსთან არეულობა 15 წუთს გაგრძელდა, რომელიც მას შემდეგ დასრულდა, რაც ადგილზე უსაფრთხოების ძალები გამოჩნდნენ.

შვედეთის საგარეო საქმეთა სამინისტროში განაცხადეს, რომ საელჩოს თანამშრომლებმა შენობა დატოვეს და უსაფრთხო ადგილზე გადავიდნენ. „ჩვენ კარგად ვართ ინფორმირებული არსებული სიტუაციის შესახებ, ჩვენი საელჩოს თანამშრომლები უსაფრთხოდ არიან და საგარეო საქმეთა სამინისტროს მათთან რეგულარული კავშირი აქვს“, - განაცხადეს უწყებაში.

28 ივნისს, სტოკჰოლმში მეჩეთთან ახლოს სკანდალური აქცია გაიმართა, რომლის ორგანიზატორმა სალვან მომიკამ ყურანის დაწვის შესახებ დადებული პირობა შეასრულა. მან ჯერ შვედეთის ჰიმნი ჩართო და შვედეთის დროშა ააფრიალა, შემდეგ კი ყურანიდან გვერდების ამოხევა დაიწყო და ცეცხლი წაუკიდა.

ყურანის დაწვამ მძაფრი რეაქცია გამოიწვია ახლო აღმოსავლეთის ქვეყნებში, კერძოდ, იორდანიაში, ერაყსა და ირანში, მაროკომ კი შვედეთიდან თავისი ელჩი გაიწვია.

თურქეთის პრეზიდენტმა რეჯეფ თაიფ ერდოღანმა ყურანის დაწვის ფაქტი დაგმო და პირობა დადო, რომ ანკარის რეაქცია ყველაზე მტკიცე იქნება.