აშშ-ში პოლიციამ დააკავა 38 წლის კაცი, რომელმაც ტექსასის შტატში ხუთი მეზობელი მოკლა

საქართველო, თბილისი - 11:15 | 03.05.2023

ნანახია: 743

აშშ-ში პოლიციამ დააკავა 38 წლის კაცი, რომელმაც 29 აპრილის ღამეს ხუთი მეზობელი მოკლა.

მექსიკური წარმოშობის კაცი, რომლის ძებნაშიც ჩართული იყო ასობით პოლიციელი, ჰიუსტონიდან ჩრდილოეთით დააკავეს, ის ერთ-ერთ შენობაში, ტანსაცმლის კარადაში იმალებოდა. მისი დაკავება სატელეფონო ზარის შემდეგ მოხერხდა. მონტგომერის ოლქის ხელისუფლების განცხადებით, ეჭვმიტანილის დაკავება ყოველგვარი გართულებების გარეშე მოხდა.

ტრაგედია 29 აპრილის ღამეს მოხდა. გავრცელებული ინფორმაციით, მეზობლებმა კაცს, რომელიც თავის ეზოში ცეცხლსასროლი იარაღიდან უმისამართოდ ისროდა, სთხოვეს ხმაური შეეწყვიტა. ამის შემდეგ ის მათ სახლში შეიჭრა და სროლა დაიწყო. დაიღუპა ხუთი ადამიანი, მათ შორის რვა წლის ბიჭი. ოჯახი ჰონდურასიდან იყო, ყველაზე უფროსი 31 წლის იყო, ყველა მოკლულს ჭრილობა თავში ჰქონდა მიყენებული. სახლში სულ 10 ადამიანი იმყოფებოდა, დანარჩენი ხუთი თავდასხმას უვნებლად გადაურჩა.