ურსულა ფონ დერ ლაიენი კიევში ჩავიდა

ევროკომისიის პრეზიდენტი ურსულა ფონ დერ ლაიენი კიევში ჩავიდა, რათა მონაწილეობა მიიღოს უკრაინა-ევროკავშირის სამიტში.

ამის შესახებ ფონ დერ ლაიენი Twitter-ზე წერს.

 „სასიამოვნოა კიევში დაბრუნება, უკვე მეოთხედ რუსეთის შეჭრის დაწყებიდან. ამ ჯერზე - ჩემს გუნდთან ერთად“, - წერს ევროკომისიის პრეზიდენტი.

მისი თქმით, ევროკავშირი ისევე მტკიცედ უჭერს მხარს უკრაინას, როგორც მანამდე.

„ჩვენ აქ ერთად ვართ, რათა ვაჩვენოთ, რომ ევროკავშირი ისევე მტკიცედ უჭერს მხარს უკრაინას, როგორც ადრე, რათა უფრო მეტად გავაღრმავოთ ჩვენი მხარდაჭერა და თანამშრომლობა“, - აღნიშნა ურსულა ფონ დერ ლაიენმა.

მასთან ერთად კიევში ჩავიდა საგარეო და უსაფრთხოების საკითხებში ევროკავშირის უმაღლესი წარმომადგენელი ჟოზეფ ბორელიც.

„ჩამოვედი კიევში, რათა გადავცეთ ევროკავშირის ძლიერი გზავნილი ყველა უკრაინელს, რომლებიც იცავენ თავიანთ ქვეყანას“, - დაწერა მან Twitter-ზე.

მისი თქმით, ევროკავშირი უკრაინის გვერდით იქნება, ვიდრე ის არ გაიმარჯვებს.

 „რუსეთის ომის დაწყებიდან ევროკავშირის დახმარებამ 50 მილიარდ ევროს მიაღწია.  ევროპა უკრაინასთან ერთად იყო პირველივე დღეებიდან და იდგება მის გვერდით გამარჯვებამდე და აღდგენამდე“, - აღნიშნა ბორელიმ.

უკრაინა-ევროკავშირის სამიტი კიევში 3 თებერვალს შედგება. მანამდე კონსულტაციები გაიმართება ევროკომისიასა და უკრაინის მთავრობის წარმომადგენელთა შორის.