ბახმუტის დასაცავად უკრაინული არმიის ძალისხმევა, სავარაუდოდ, სტრატეგიულ ხასიათს ატარებს, მიუხედავად იმ ფასისა, რომელსაც უკრაინა იხდის - ISW

ამერიკის ომის შემსწავლელი ინსტიტუტის (ISW) შეფასებით, ქალაქ ბახმუტის დასაცავად უკრაინული არმიის ძალისხმევა, სავარაუდოდ, სტრატეგიულ ხასიათს ატარებს, მიუხედავად იმ ფასისა, რომელსაც უკრაინა იხდის.

„იმის მიუხედავად, რომ ხარჯები, რომლებიც ბახმუტის დაცვას უკავშირდება, დიდია და სავარაუდოდ, მოიცავს ალტერნატიულ ხარჯებსაც, რომელიც უკავშირდება პოტენციურ კონტრშეტევით ოპერაციებს სხვა ადგილებში, უკრაინა მნიშვნელოვნად დიდ ფასს გადაიხდიდა, რუსული ჯარებისთვის ბახმუტის იოლად აღების შესაძლებლობა რომ მიეცა.

თავად ბახმუტს არ გააჩნია ოპერატიული ან სტრატეგიული მნიშვნელობა, მაგრამ თუ კი მას რუსული ჯარი სწრაფად და იოლად აიღებდა, იმედი გაუჩნდებოდათ ფართო შეტევითი ოპერაციების განსახორციელებლად, რომელიც უკრაინას აიძულებდა საჩქაროდ აეგო თავდაცვითი პოზიციები ნაკლებად ხელსაყრელ ტერიტორიებზე“, - ნათქვამია ინსტიტუტის ანგარიშში.

ინსტიტუტში აღნიშნავენ, რომ უკრაინის არმია მანამდე იყენებდა რუსების თანდათანობით დაღლის ანალოგიურ მოდელს, რის გამოც მცირე ტაქტიკური წარმატებების შედეგად მათი ოპერაციები გარკვეულ რაიონებში თვეების შემდეგ პირადი შემადგენლობისა და ტექნიკის დიდი დანაკარგებით სრულდებოდა.

„2022 წლის ზაფხულის დასაწყისში რუსეთის არმია რამდენიმე თვის განმავლობაში სევეროდონეცკსა და ლისიჩანსკში ცდილობდა უკრაინის ეფექტური თავდაცვის გარღვევას. რუსებმა დაიკავეს ლისიჩანსკი, ამ რაიონიდან  მხოლოდ უკრაინის ჯარის ორგანიზებული გასვლის შემდეგ.

თუმცა ლისიჩანსკისა და ლუჰანსკის ოლქის ადმინისტრაციული საზღვრის დაკავება რუსეთის ძალებისთვის ოპერატიულად უმნიშვნელო მალევე აღმოჩნდა, საბოლოო ჯამში კი ამ რეგიონში უკრაინის თავდაცვის შედეგად ლუჰანსკის ოლქში რუსეთის შეტევა დასრულდა, რამაც დონბასში 2022 წლის ზაფხულსა და შემოდგომაზე  რუსეთის შეტევითი ოპერაციების საერთო სტაგნაცია გამოიწვია“, - ნათქვამია ISW-ის ანგარიშში.

ანალიტიკოსებს მიაჩნიათ, რომ ბახმუტში უკრაინის თავდაცვა სავარაუდოდ, გამოიწვევს ანალოგიურ შედეგს და აღნიშნავენ, რომ იმის მიუხედავად, რომ  რუსეთის ძალებს ამ რაიონში 2022 წლის მაისიდან გადაჰყავთ ცოცხალი ძალა და ტექნიკა, ჯერჯეობით ვერ მიაღწიეს მნიშვნელოვან ოპერატიულ წარმატებებს, რომელიც სერიოზულ საფრთხეს შეუქმნიდა უკრაინის თავდაცვას.

ISW-ში ფიქრობენ, რომ უკრაინის ძალები ბახმუტის რაიონში ეფექტურად აკავებენ რუსეთის არმიასა და ტექნიკას და ამით რუსულ ჯარს არ აძლევენ შესაძლებლობას აწარმოონ შეტევითი მოქმედებები სხვა მიმართულებებზე.