უკრაინამ მოსკოვის განცხადებას კრამატორსკზე დარტყმის შედეგად 600 უკრაინელი ჯარისკაცის დაღუპვის შესახებ, სიცრუე უწოდა

უკრაინის შეიარაღებული ძალების აღმოსავლეთ ჯგუფის წარმომადგენელი სერგეი ჩერევატი ამბობს, რომ რუსეთის თავდაცვის სამინისტროს განცხადება კრამატორსკის დაბომბვის შედეგად 600 უკრაინელი სამხედროს დაღუპვის შესახებ სიმართლეს არ შეესაბამება.

„ეს ინფორმაცია ისეთივე სიმართლეა, როგორც ის მონაცემები, რომ მათ გაანადგურეს ყველა ჩვენი HIMARS“, - განაცხადა ჩერევატიმ.

მოსკოვის განცხადებებს კრამატორსკზე დარტყმის შედეგად უკრაინის დიდი დანაკარგის შესახებ, უკრაინის შეირაღებულ ძალებში „საინფორმაციო ოპერაცია“ უწოდეს.

მანამდე რუსეთის თავდაცვის სამინისტრომ კრამატორსკზე დარტყმების შესახებ განაცხადა და ქალაქზე იერიშს  „შურისძიების ოპერაცია“ უწოდა მაკიივკაში რუსი სამხედროების დახოცვისთვის

„კრამატორსკში უკრაინის ჯარების ქვედანაყოების დროებითი დისლოკაციის პუნქტებზე სარაკეტო დარტყმის შედეგად, განადგურებულია 600-ზე მეტი ჯარისკაცი“, - განაცხადა რუსეთის თავდაცვის სამინისტრს წარმომადგენელმა.

ამასთან, კრამატორსკზე მიტანილი იერიშის შესახებ განცხადება გაავრცელა ქალაქის მერმა ალექსანდრ გონჩარენკომ.

მის ფეისბუქპოსტში საუბარია რვა მრავალსართულიანი საცხოვრებელი სახლისა და ორი სასწავლო დაწესებულების დაზიანების შესახებ. მისივე ინფორმაციით, მშვიდობიან მოსახლეობაში მსხვერპლი არ არის, დაღუპული და დაჭრილი უკრაინელი სამხედროების შესახებ კი ინფორმაციაში არაფერია ნათქვამი.

შეგახსენებთ, მაკიივკაში რუსული ბაზის წინააღმდეგ უკრაინის შეიარაღებულმა ძალებმა იერიში 1-ელ იანვარს მიიტანა. უკრაინის მხარის განცხადებით, დაიღუპა 400-მდე რუსი ჯარისკაცი, რუსეტის თავდაცვის სამინისტრომ კი მხოლოდ 89 სამხედროს დაღუპვა აღიარა.