აშშ უკრაინას გადასცემს დამატებით 1.85 მლრდ დოლარის სამხედრო დახმარების პაკეტს, რომელიც Patriot-ის თავდაცვით სისტემებსაც მოიცავს

აშშ-ის სახელმწიფო მდივანმა, ენტონი ბლინკენმა უკრაინისთვის დამატებით 1.85 მილიარდი აშშ დოლარის ღირებულების სამხედრო დახმარების პაკეტის შესახებ განაცხადა. აღნიშნული პაკეტი მოიცავს Patriot-ის თავდაცვით სისტემებსაც, რომელსაც უკრაინა პირველად მიიღებს.

აშშ-ის სახელმწიფო მდივნის, ენტონი ბლინკენის განცხადებით, დახმარების პაკეტი მოიცავს 1 მილიარდი დოლარის ღირებულების იარაღს და აღჭურვილობას პენტაგონის მარაგებიდან, მათ შორის Patriot-ის პირველ სისტემას, და 850 მილიონი დოლარის დაფინანსებას უკრაინის უსაფრთხოების ხელშეწყობის ინიციატივის ფარგლებში. დახმარების ნაწილით დაფინანსდება სატელიტური კომუნიკაციების სისტემა, რომელიც, დიდი ალბათობით, მოიცავს ილონ მასკის მფლობელობაში მყოფ, SpaceX Starlink-ის მნიშვნელოვან სატელიტს.

„ეს მილიარდი დოლარი უკრაინას უზრუნველყოფს გაფართოებული საჰაერო თავდაცვისა და ზუსტი დარტყმების შესაძლებლობებით ისევე, როგორც დამატებითი საბრძოლო მასალითა და კრიტიკული აღჭურვილობით, რომელსაც უკრაინა ეფექტურად იყენებს ბრძოლის ველზე თავის დასაცავად“, – ნათქვამია ბლინკენის განცხადებაში.