ოკუპანტები ინტენსიურ საბრძოლო მოქმედებებს ახორციელებენ დონეცკის ოლქში, ბახმუტისა და ავდეევკის მიმართულებით - უკრაინის გენშტაბი

უკრაინის არმიის გენშტაბის ინფორმაციით, რუსეთის საოკუპაციო ძალები ინტენსიურ საბრძოლო მოქმედებებს დონეცკის ოლქში, ბახმუტისა და ავდეევკის მიმართულებით ახორციელებს. აქტიურად იყენებს ავიაციას სახმელეთო დანაყოფების მხარდასაჭერად. ვრცელდება ინფორმაცია, რომ უკრაინელმა სამხედროებმა ბახმუტთან რუსეთის არმიის სამხედრო თვითმფრინავი ჩამოაგდეს.

გასული დღე-ღამის განმავლობაში რუსმა სამხედროებმა განახორციელეს ორი სარაკეტო და ათი საჰაერო დარტყმა, ასევე სამჯერ გახსნეს ცეცხლი ზალპური ცეცხლის სარაკეტო სისტემებიდან უკრაინის ჯარების პოზიციებზე და შეხების ხაზის გასწვრივ დასახლებულ პუნქტებზე. სარაკეტო თავდასხმა განხორციელდა ქალაქ კრამატორსკში მდებარე სამოქალაქო ინფრასტრუქტურულ ობიექტზე.

უკრაინის შეიარაღებული ძლების გენშტაბის ინფორმაციით, რუსეთის საოკუპაციო ძალებმა „გრადის“ სისტემებით დნიპროპეტროვსკის ოთხი დასახლება დაბომბეს.