უკრაინის ხელისუფლების შეცვლა „სპეცოპერაციის“ მიზანი არ არის - პესკოვი

რუსეთის პრეზიდენტის პრეს-მდივანი დმიტრი პესკოვი აცხადებს, რომ უკრაინაში ხელისუფლების შეცვლა ე.წ. სპეცოპერაციის მიზანი არ არის. იუწყება რუსული სამთავრობო მედიასაშუალება „ტასი“.

შეკითხვაზე არის თუ არა უკრაინის ხელისუფლების შეცვლა „სპეცოპერაციის“ ერთ-ერთი მიზანი, პესკოვმა უპასუხა; „არა, პრეზიდენტმა უკვე ისაუბრა ამის შესახებ“.

ბრიფინგზე პესკოვს სთხოვეს კომენტარის გაკეთება ვოლოდიმირ ზელენსკის სიტყვებზე, რომ მოსკოვს არ სურს მშვიდობის დამყარება, უკრაინის ხელისუფლებასთან მოლაპარაკებები კი მხოლოდ იმიტომ სურს, რომ ამოისუნთქოს, პესკოვმა განაცხადა: „რუსეთს სურს თავისი მიზნების მიღწევა და მიაღწევს კიდეც“.

მანამდე, რუსეთის ფედერაციის საბჭოს ვიცე-სპიკერმა კონსტანტინ კოსაჩოვმა განაცხადა, რომ რუსეთსა და უკრაინას შორის ურთიერთობის ნორმალიზება, შესაძლებელია მხოლოდ კიევში ხელისუფლების შცვლის შემდეგ, რადგან ამჟამინდელ ხელისუფლებას არ აქვს მანევრის თავისუფლება და თავისი წინა ქმედებებისა და იდეოლოგიის ტყვეობაშია.

შეგახსენებთ, რუსეთი 24 თებერვალს უკრაინას თავს დაესხა. პუტინმა მას „სპეცოპერაცია“ უწოდა და განაცხადა, რომ მათი მიზანია უკრაინის დემილიტარიზაცია, როელიც თითქოს რუსეთის უსაფრთხოებას საფრთხეს უქმნის.

ამასთან, 25 თებერვალს პუტინმა უკრაინელ სამხედროებს ძალაუფლების ხელში აღებისკენ მოუწოდა, რადგან რუსეთისთვის უფრო მარტივია სამხედროებთან მოლაპარაკება, ვიდრე ხელისუფლებასთან, რომელიც „დაჯდა კიევში და მთელი უკრაინელი ხალხი მძევალდ აიყვანა“.