მალაიზიური ბოინგის საქმეზე ჰააგის სასამართლომ რუსეთის 2 და უკრაინის 1 მოქალაქე დამნაშავედ ცნო

ჰააგის საოლქო სასამართლომ 2014 წლის ივლისში დონეცკის ოლქში „მალაიზიური ავიახაზების კუთვნილი სამგზავრო ბოინგის კატასტროფის საქმეზე“ გადაწყვეტილება გამოაცხადა.

BBC-ის ინფორმაციით, ჰააგის სასამართლომ თვითმფრინავის ჩამოგდების საქმეზე დამნაშავედ ცნო რუსეთის ორი მოქალაქე და უკრაინის ერთი მოქალაქე. კერძოდ, იგორ გირკინი – რუსეთის მოქალაქე, რომელიც 2014 წლის ზაფხულში თვითგამოცხადებული დონეცკის სახალხო რესპუბლიკის ე.წ. თავდაცვის მინისტრი იყო; რუსეთის სამხედრო დაზვერვის გადამდგარი ოფიცერი სერგეი დუბინსკი; უკრაინის მოქალაქე ლეონიდ ხარჩენო, რომელიც 2014 წლის ზაფხულში ე.წ. დონეცკის სახალხო რესპუბლიკის სამხედრო დაზვერვის დანაყოფს ხელმძღვანელობდა.

სასამართლომ აღიარა, რომ გირკინმა, დუბინსკიმ და ხარჩენკომ მნიშვნელოვანი როლი შეასრულეს მარშრუტის კოორდინაციაში, "ბუკის" ტრანსპორტირებასა და დაცვაში. ამავდროულად, სასამართლო დაეთანხმა გამოძიების დასკვნებს, რომ ბოინგის ჩამოგდებული რაკეტის გაშვებაში პირადად არცერთ მსჯავრდებულს მონაწილეობა არ მიუღია.

მოსამართლემ განაცხადა, რომ საქმის მასალებიდან შეუძლებელი იყო იმის დადგენა, თუ როგორ მოიქცა ბუკის ეკიპაჟი რაკეტის გაშვების დროს, ვინ მისცა ეკიპაჟს რაკეტის გაშვების ინსტრუქცია და როგორ მოხდა აფეთქება.

სასამართლოს დასკვნით, MH17 Boeing ჩამოაგდეს რუსული წარმოების რაკეტით, ბუკის რაკეტით, რომელიც აღმოსავლეთ უკრაინაში ქალაქ სნეჟნოესთან, პერვომაისკის რაიონიდან გაისროლეს.

სასამართლომ ასევე აღიარა, რომ თვითმფრინავის ჩამოგდების დროს ე.წ. დონეცკის "სახალხო რესპუბლიკაზე" კონტროლს ახორციელებდა რუსეთი.

ამსტერდამიდან კუალა-ლუმპურში მიმავალი ავიალაინერი რეისით MH17, რომლის ბორტზეც 298 ადამიანი იმყოფებოდა, 2014 წლის 17 ივლისს ჩამოაგდეს. მგზავრთა შორის 80 ბავშვი იყო. ნიდერლანდების და ავსტრალიის მთავრობებმა დონეცკის ოლქში 2014 წელს მალაიზიური ავიახაზების კუთვნილი სამგზავრო თვითმფრინავის ჩამოგდებაზე პასუხისმგებლობა რუსეთს ოფიციალურად დააკისრეს.