რუსები დნიპროს კამიკაძე დრონებით თავს დაესხნენ - არიან დაჭრილები

დნიპროპეტროვსკის საოლქო ადმინისტრაციის ხელმძღვანელის ვალენტინ რეზნიჩენკოს ინფორმაციით, ღამით დნიპრო ოკუპანტების მხრიდან კამიკაძე დრონების ცეცხლის ქვეშ მოექცა.

მისი თქმით, დრონები ლოჯისტიკურ საწარმოს დაესხნენ თავს, დაჭრილია ოთხი თანამშრომელი, რომლებიც საავადმყოფოებში გადაიყვანეს. სამი მათგანის მდგომარეობა მძიმეა.

მისივე თქმით, დარტყმის შედეგად 3 ათას კვ/მ ფართობზე გაჩნდა ძლიერი ხანძარი, რომელიც უკვე ლიკვიდირებულია. განადგურებულია საწარმოს საწყობები.

გარდა ამისა, რეზნიჩენკოს თქმით, რუსეთის არმიამ „გრადისა“ და მძიმე არტილერიის მეშვეობით იერიში მიიტანა ნიკოპოლის რაიონზე, რომელიც დნიპროს ნაპირზე, რუსების მიერ ოკუპირებული ზაპოროჟიეს ატომური ელექტროსადგურის მოპირდაპირედ მდებარეობს. მისივე ინფორმაციით, დარტყმების შედეგად არავინ დაშავებულა.