თურქეთმა რუსეთის სამხედრო გემები შავ ზღვაში არ შეუშვა, ისინი ვლადივოსტოკში ბრუნდებიან

თურქეთმა რუსეთის სამხედრო გემები შავ ზღვაში არ შეუშვა. რუსეთის წყნარი ოკეანის ფლოტის გემები თებერვლის შემდეგ ელოდნენ თურქეთის ხელისუფლებისგან ბოსფორის სრუტეში გავლის ნებართვას, რათა შავ ზღვაში შესულიყვნენ. გემები ვლადივასტოკში ბრუნდებიან.

როგორც შავი ზღვის სტრატეგიული კვლევების ინსტიტუტის სამონიტორინგო ჯგუფის ხელმძღვანელი, ანდრი კლიმენკო წერს, წყნარი ოკეანის ფლოტის სარაკეტო კრეისერი „ვარიაგი“ და წყალქვეშა ნავების წინააღმდეგ საბრძოლველად განკუთვნილი დიდი გემი „ადმირალი ტრიბუცი“ გემების მოძრაობაზე დამკვირვებლებმა კვირას, 6 ნოემბერს, შენიშნეს სინგაპურში. ისინი თავიანთი ბაზირების ადგილზე, ვლადივოსტოკში მიემართებოდნენ.

მისი მონაცემებით, „ვარიაგი“ და „ადმირალი ტრიბუცი“ 2 თებერვლიდან იდგნენ ხმელთაშუა ზღვაში და შავ ზღვაში გასასვლელად ემზადებოდნენ უკრაინაზე თავდასასხმელად.