საქართველოს ისტორიაში არ არსებობს "ნაციონალურ მოძრაობაზე" უფრო ბოლშევიკური და ანტიდასავლური ძალა - მდინარაძე

საქართველოს ისტორიაში არ არსებობს უფრო ბოლშევიკური და ანტიდასავლური ძალა, ვიდრე ეს არის ნაცმოძრაობა, - ამის შესახებ "ქართული ოცნების" აღმასრულებელმა მდივანმა, მამუკა მდინარაძემ ჟურნალისტებთან საუბრისას განაცხადა.

"ნაციონალური მოძრაობა რომ რაღაც ცუდს და მათ შორის, ანტიდასავლურ ძალას დაგიძახებს, ეს იმას ნიშნავს, რომ სწორ გზაზე დგახარ. ანუ მაშინ ხარ ევროპელიც, მაშინ ხარ დასავლეთელიც და მაშინ იბრძვი სწორად შენი სამშობლოსთვის. იმიტომ, რომ საქართველოს ისტორიაში არ არსებობს უფრო ბოლშევიკური და ანტიდასავლური ძალა, ვიდრე ეს არის ნაცმოძრაობა, რომელიც სიტყვით ყოველთვის ვითომ დასავლეთისკენ დეკლარირებს და საქმით ყოველთვის მტრისა და ანტიქართულ საქმეს აკეთებს. ასე იყო რეზოლუციის შემთხვევაში, როდესაც ქართველ მებრძოლებს ომის დაწყება დააბრალეს. ასევე იყო სტრატეგიული ობიექტების გაყიდვის შემთხვევაშიც. მათი ისტორია ასეთია. დღესაც კი ისინი ყველაფერს აკეთებენ იმისთვის, რომ საქართველოს წინააღმდეგ იყვნენ, სხვა ქვეყნების ინტერესები გაატარონ და საკუთარი მენკანტილური ინტერესები წამოწიონ წინ. ერთადერთი პარტიაა, რომელიც დღევანდელ სიტუაციაში, საქართველოში ამ ქვეყანასა და ეკლესიას ებრძვის. გახსოვთ ალბათ, ეკლესიას ებრძოდნენ ბოლშევიკები და დღეს ებრძვიან ნაციონალური მოძრაობის წარმომადგენლები. ასევე, საქართველოსა და ქართულ იდენტობას ებრძოდნენ ბოლშევიკები და დღეს ებრძვიან ენმ-ს წარმომადგენლები", - თქვა მდინარაძემ.