ე.წ.რეფერენდუმში ოკუპირებული მარიუპოლის მცხოვრებთა მხოლოდ 20%-მა მიიღო მონაწილეობა - მერი

ოკუპირებულ მარიუპოლში ამჟამად 100 ათასამდე ადამიანი ცხოვრობს და ოკუპანტების მიერ გამართულ   ფსევდორეფერენდუმში მხოლოდ ყოველმა მეხუთემ მიიღო მონაწილეობა.  

ამის შესახებ ქალაქის მერმა ვადიმ ბოიჩენკომ განაცხადა.

„მარიუპოლში ომამდე 541 ათასი ადამიანი ცხოვრობდა, დღეს იქ 100 ათსამდე მცხოვრებია დარჩენილი. შეგვიძლია ვისაუბროთ ადამიანების უმრავლესობაზე? მარიუპოლელების უმეტესობა - 200 ათასზე მეტი ადამიანი იმყოფება უკრაინის კონტროლირებად ტერიტორიაზე. ამას არ შეიძლება რეფერენდუმი უწოდო, ეს სოციოლოგიური გამოკითხვაა.

ადამიანების მცირე რაოდენობა, იძულებულია ხმა მისცეს, რადგან მათ სახლში აკითხავენ ავტომატით შეიარაღებული პირები. ადამიანები ამაზე იძულებით მიდიან.  ეს იმ 100 ათასიდან 20 პროცენტია, რომლებსაც  მარიუპოლში იძულებით აჩერებენ. ეს შეიძლება იყოს დემოკრატიის ინსტრუმენტი?“ - თქვა ბოიჩენკომ.

ამასთან, ბოიჩენკომ აღნიშნა, რომ ოკუპანტები კეტავენ მარიუპოლს, კერძოდ, იძულებითი მობილიზაციისთვის. მისი თქმით, რუსეთს შეუძლია მარიუპოლიდან 10 ათასზე მეტი მამაკაცის მობილიზაცია. მერმა ოკუპირებული ქალაქის მოსახლეობას მოუწოდა, რაც შეიძლება სწრაფად დატოვონ მარიუპოლი.