ზემო ლარსის გამშვებ პუნქტთან სამხედრო კომისარიატის მობილიზაციის პუნქტი მოეწყობა - რუსული მედია

რუსული მედიის ინფორმაციით, საქართველოს საზღვართან, ზემო ლარსის გამშვებ პუნქტთან სამხედრო კომისარიატის მობილიზაციის პუნქტი მოეწყობა.

ჩრდილოეთ ოსეთის შინაგან საქმეთა სამინისტროში აღნიშნავენ, რომ საზღვარზე შექმნილი ვითარება უკიდურესად დაძაბულია საქართველოს მიმართულებით გაზრდილი ნაკადის გამო.

უწყების ცნობით, რესპუბლიკის შინაგანს საქმეთა მინისტრმა სასაზღვრო სამმართველოს და საბაჟოს ხელმძღვანელებთან გამშვებ პუნქტზე თათბირი გამართა. სამინისტროს განცხადებაში აღნიშნულია, რომ მართლსაწინააღმდეგო ქმედებებისა და კონფლიქტური სიტუაციების რისკების შესამცირებლად, მიღებულ იქნა გადაწყვეტილება, მოქალაქეებს უფლება დართონ, საზღვარი ფეხით გადაკვეთონ.

მანამდე ჩრდილოეთ ოსეთის რესპუბლიკის ვიცე-პრემიერმა ირბეკ ტომაევმა განაცხადა, რომ საზღვარზე 3,5 ათასი მანქანაა დაგროვილი, ხოლო გზებზე სატრანზიტო მანქანების საერთო რაოდენობა 4891 იყო.