იზიუმში კიდევ ორი საერთო საფლავი აღმოვაჩინეთ, სადაც ასობით ცხედარი იყო დამარხული - ზელენსკი

უკრაინის პრეზიდენტმა ვოლოდიმირ ზელენსკიმ ტელეარხ CBS-თან ინტერვიუში განაცხადა, რომ ქალაქ იზიუმში კიდევ ორი მასობრივი საფლავი აღმოაჩინეს, სადაც ასობით ცხედარი იყო დამარხული.

 „დღეს კიდევ უფრო მეტი ინფორმაცია შევიტყვეთ. აღმოჩენილია ორი საერთო საფლავი, სადაც ასობით ადამიანია დამარხული. ჩვენ ვსაუბრობთ პატარა ქალაქ იზიუმზე“, - განაცხადა ზელენსკიმ.

23 სექტემბერს ოკუპანტებისგან გათავისუფლებულ ქალაქ იზიუმში დასრულდა მასობრივ საფლავებში დამარხული მოკლული ადამიანების ექსგუმაცია, - სამარხში ნაპოვნი იყო 447 ადამიანის ცხედარი, რომელთა შორის იყვნენ ბავშვები.

ხარკოვის ოლქის სამხედრო ადმინისტრაციის ხელმძღვანლის ოლეგ სინეგუბოვის თქმით, დაღუპულთა უმეტესობას ძალადობის კვალი აღენიშნება, 30 კი სასტიკად არის ნაწამები. არის ცხედრები, რომლებსაც ყელზე შემოხვეული აქვთ თოკები, შეკრული აქვთ ხელები, გადამტვრეულიაქვთ კიდურები და მიყენებულ აქვთ ცეცხლნასროლი ჭრილობები.