ებრაჰიმ რაისი აცხადებს, რომ ირანი დემონსტრანტების წინააღმდეგ გადამწყვეტად იმოქმედებს

ირანის პრეზიდენტმა ებრაჰიმ რაისმა განაცხადა, რომ მზად არის გადამწყვეტად იმოქმედოს საპროტესტო აქციების წინააღმდეგ, რომელიც მორალის პოლიციის მიერ დაკავებული ახალგაზრდა ქალის სიკვდილის შემდეგ ქვეყნის თითქმის ყველა პროვინციაში ერთ კვირაზე მეტია მიმდინარეობს.

ოფიციალური მონაცემებით, დემონსტრანტებთან შეტაკებების შედეგად 35 ადამიანი დაიღუპა.

სოციალურ ქსელებში ვრცელდება კადრები, სადაც ჩანს, პოლიცილები როგორ ესვრიან დემონსტრანტებს. უფლებადამცველი ორგანიზაციები აცხადებენ, რომ ძალოვანები იყენებენ საბრძოლო ტყვიებს.

მოსახლეობის პროტესტს ირანის რეჟიმის მწვავე რეაქცია მოჰყვა. გავრცელებული ინფორმაციით, დაკავებულია ასობით ადამიანი, მხოლოდ გუილანის პროვინციაში დააკავეს 739 დემონსტრანტი, მათ შორის 60 ქალი. ასევე გავრცელებული ინფორმაციით,  დაკავებულებს ძალოვანები სასტიკად უსწორდებიან.

როგორც BBC-ის ქალაქ ოშნევიედან აცნობეს, დემონსტრანტებმა ზოგიერთ უბანზე დროებითი კონტროლიც დაამყარეს.

რაისმა თავის განცხადებაში პროტესტებს „არეულობები“ უწოდა.

ირანში მიმდინარე საპროტესტო აქციებს გამოეხმაურა ვაშინგტონი. სახელმწიფო მდივანმა ენტონი ბლინკენმა განაცხადა, რომ აშშ შეასუსტებს ინტრენეტის ბლოკირებას, რათა ირანელებმა თავი იზოლირებლად არ იგრძნონ.

ყოვლისმომცველი პროტესტი ირანში 22 წლის მაჰსა ამინის სიკვდილის შემდეგ დაიწყო, რომელიც მორალის პოლიციამ დააკავა. ეროვნებით ქურთი მაჰსა ამინი თეირანში დააკავეს კანონის დარღვევისთვის, რომლის თანახმად, ქალებმა თმა ჰიჯაბით ან თავსაფრით უნდა დაიფარონ, ხელები და ფეხები კი გრძელი, თავისუფალი სამოსით.

დაკავებიდან მალევე ამინი კომაში ჩავარდა და სამი დღის შემდეგ საავადმყოფოში გარდაიცვალა. ხელისუფლების ვერსიით, მას გული გაუჩერდა. თუმცა ამინის ნათესავები ამბობენ, რომ მაჰსას გულის პრობლემები არასდროს ჰქონია. ისინი ეჭვობენ, რომ გოგონა ცემის შედეგად გარდაიცვალა. ამინის მამის თქმით, მას ქალიშვილის აუტოფსიის შედეგების გაცნობის უფლება არ მისცეს.